ཨྱོན་གུ་རུ་རིན་པོ་ཆེའི་ སྤྲེལ་ཟླ་ཚེས་བཅུ་ བརྩི་སྲུང་ཞུ་དགོ་པའི་ ཁུངས་དང་དགོས་དོན།

༉ ད་རིས་ རང་ཟླ་༥ པའི་ཚེས་༡༠ དེ་ སྤྲེལ་ཟླ་ཚེས་བཅུ་ཟེར་ ཨྱོན་གུ་རུ་རིན་པོ་ཆེ་ སྐུ་འཁྲུངས་པའི་ དུས་ཆེན་ཁྱད་པར་ཅན་ཅིག་ཨིནམ་ལས་ རྒྱལ་ཁབ་ཀྱི་ ལྷ་ཁང་དང་ དགོན་སྡེ་ལ་ལོ་ཅིག་ནང་ ཚེས་བཅུ་སྐུ་འཆམ་གྱི་རིགས་ཚུ་ མཇལ་ཁ་གནང་ཐོག་ལས་ རྩིས་སྲུང་ཞུཝ་ཨིན།
དེ་ཡང་ སངས་རྒྱས་གཉིས་པ་ ཨྱོན་གུ་རུ་རིན་པོ་ཆེ་གིས་ དུས་རབས་༨ པའི་ནང་ འབྲུག་ལུ་ ཞབས་ཀྱིས་བཅགས་ཏེ་ བདུད་བཏུལ་ གསང་སྔགས་ཀྱི་ ཆོས་འཁོར་བསྐོར་ ས་གཞིས་ག་ར་ སྦས་གནས་ཁྱད་པར་ཅན་ལུ་ བྱིན་གྱིས་བརླབས་ གཏེར་ཁ་སྦས་ ཚོགས་བསག་གི་རྟེན་ སྐུ་རྗེས་དང་ ཞབས་རྗེས་ལ་སོགས་པ་ མང་རབས་ཅིག་ བཞག་གནང་མི་ལུ་ བཀྲིན་བསམ་ནི་དང་ གུས་བཏུད་ཞུ་ཐབས་ལུ་ཨིན།
སྤྲེལ་ཟླ་ཚེས་བཅུ་དེ་ཡང་ རང་ཟླ་༥ པའི་ཚེས་༡༠ དང་ རང་ཟླ་༦ པའི་ཚེས་༡༠ ལུ་སྦེ་ བརྩི་སྲོལ་༢ ཡོད་རུང་ འབྲུག་རྒྱལ་ཁབ་ནང་འབད་བ་ཅིན་ འབྲུག་ལུགས་བསྟན་རྩིས་དང་ ཕུགས་རྩིས་ཀྱི་ དགོངས་དོན་དང་མཐུནམ་སྦེ་ རང་ཟླ་༥ པའི་ཚེས་༡༠ ལུ་ བརྩི་སྲུང་འབདཝ་ཨིན།
ཨྱོན་གུ་རུ་རིན་པོ་ཆེ་དེ་ སྤྱིར་བཏང་ དེ་བཞིན་གཤེགས་པ་ག་ར་གི་ གསུང་གི་བདག་ཉིད་དང་ ལྷག་པར་དུ་ ནུབ་ཕྱོགས་བདེ་བ་ཅན་ཞིང་ཁམས་ཀྱི་ མགོན་པོ་འོད་དཔག་མེད་ཀྱི་ཐུགས་ལས་ གསེར་གྱི་རྡོ་རྗེ་ཧྲཱི༔གིས་ མཚན་མི་ཅིག་ མེ་ཏོག་པདྨའི་སྦུག་ལུ་ ཕོག་མི་ལས་ སྐུ་འཁྲུངས་ཡོདཔ་ཨིན་པས།
གནས་ཕུན་སུམ་ཚོགས་པ་ དབུས་གྱུར་རྡོ་རྗེ་གདན་གྱི་ནུབ་ཕྱོགས་དང་ ཨྱོན་ཡུལ་གྱི་ ལྷོ་ནུབ་ཁ་ཐུག་ དེ་ལས་ སྲིན་པོའི་ཡུལ་གྱི་ ཐག་ཉེ་སུ་ཡོད་མི་ དྷ་ན་ཀོ་ཤའི་མཚོའམ་ སྲིན་དྷུའི་མཚོ་གླིང་ལས་ སྐུ་འཁྲུངས་ཡོདཔ་ད་ མཁས་པ་ལ་ལོ་ཅིག་གིས་ དྷ་ན་ཀོ་ཤའི་མཚོ་དེ་ པཱ་ཀིསི་ཏཱན་རྒྱལ་ཁབ་ནང་ཡོད་པའི་ སོ་ཝཱཌ་དང་ ལ་ལོ་ཅིག་གིས་ རྒྱ་གར་ཨོ་ཌི་ས་དེ་ཨིནམ་སྦེ་ བཤད་སྲོལ་ཡོདཔ་བཞིན་དུ་ དུས་ཕུན་སུམ་ཚོགས་པ་ སངས་རྒྱས་སྐུ་མྱ་ངན་ལས་འདས་ཏེ་ ལོ་༥ གི་ཤུལ་ལས་ ཤིང་སྤྲེལ་གྱི་ལོ་ལུ་ ཕ་མེད་མ་མེད་ ཁ་དོག་སྣ་ཚོགས་དང་ལྡནམ་སྦེ་ མེ་ཏོག་པདྨའི་སྦུབས་ལས་ ལོ་ན་༨ དང་ལྡན་པའི་ ན་ཆུང་ཅིག་ལུ་ སྐུ་འཁྲུངས་ཡོདཔ་ཨིན་པས།
དེ་བསྒང་ ནུབ་ཕྱོགས་ཨྱོན་ཡུལ་གྱི་རྒྱལཔོ་ ཨིན་དྲ་བོ་དྷི་བར་པ་ལུ་ སྲས་མེད་ནི་གིས་ དཀོན་མཆོག་ལུ་ མཆོད་པ་དང་ ངན་སློང་ལུ་ སྦྱིན་པ་བཏང་སྟེ་ བང་མཛོད་རྫོགས་སོཔ་ལས་ རྒྱ་མཚོའི་གླིང་ལས་ ཡིད་བཞིན་ནོར་བུ་ ལེན་པར་སོང་སྟེ་ ལོག་བྱོན་པའི་ལམ་ཁར་ ཆོས་བློན་ཏྲིག་པ་འཛིན་གྱིས་ གུ་རུ་མཇལ་ཏེ་ རྒྱལཔོ་ལུ་ཞུཝ་ད་ རྒྱལཔོ་གིས་ པདྨའི་སྡོང་པོ་ལས་ གུ་རུ་ཚུར་ལེན་ཞིནམ་ལས་ ས་གུ་བཞག་པའི་སྐབས་ པདྨའི་གདན་ལོག་ཅི་ར་ བྱུང་མི་ལུ་བརྟེན་ མཚན་ཡང་ དྨ་འབྱུང་གནས་ཟེར་ ཞུ་ཡོདཔ་ཨིན་པས།
དེ་ལས་ རྒྱལཔོ་གིས་ ཁྱོད་ཀྱི་ ཡབ་དང་ཡུམ་ག་སྨོ་ གཡུས་ག་ཏེ་ལས་སྨོ་ གསོལ་ཚོགས་ག་ཅི་བཞེསཔ་སྨོ་ ཕྱག་ལཱ་ག་ཅི་སྨོ་ཟེར་ ཞུ་བའི་སྐབས་ གུ་རུ་གིས་ ང་ཡི་ཕ་ནི་རིག་པའི་ཡེ་ཤེས་ཡིན། །མ་ནི་དབྱིངས་ཕྱུག་ཀུན་ཏུ་བཟང་མོ་ཡིན། །ཡུལ་ནི་ཆོས་དབྱིངས་སྐྱེ་བ་མེད་པ་ཡིན། །རིགས་ནི་དབྱིངས་རིག་གཉིས་སུ་མེད་པར་གཏོགས། །ཟས་སུ་གཉིས་སྣང་རྟོག་པ་ཟ་བ་ཡིན། །འདི་ན་ཉོན་མོངས་གསོད་པའི་སྤྱོད་པ་སྐྱོང་། །ཟེར་གསུངསམ་ལས་ ཡ་མཚན་གྱི་ གནས་ལུ་གཟིགས་ཏེ་ ཕོ་བྲང་ནང་ གདན་དྲངས་ཞིནམ་ལས་ སྲས་ཀྱི་ཚབ་སྦེ་ རྒྱལ་སྲིད་ཕུལ་ མཚན་ཡང་ མཚོ་སྐྱེས་རྡོ་རྗེ་ཟེར་གསོལ་ཡོདཔ་ཨིན་པས།
ཨྱོན་གུ་རུ་རིན་པོ་ཆེ་གིས་ རྒྱལ་ཁབ་ནང་ ལན་ཐེངས་༣ ཞབས་ཀྱིས་བཅགས་ཏེ་ བདུད་དང་ འདྲེ་སྲིན་ཚུ་ དམ་བཏགས་ཡོད་མི་དེ་ ཐེ་ཚོམ་ག་ནི་ཡང་མེདཔ་ད་ བུམ་ཐང་གི་རྒྱལཔོ་ སྲིན་དྷུ་ར་ཛ་གིས་ མགྲོན་བརྡ་དང་བསྟུན་ འགོ་དང་པ་ ཞབས་བཅགས་གནང་པའི་སྐབས་ བུམ་ཐང་སྐུ་རྗེས་བྲག་དང་ ཀུན་བཟང་བྲག་ མེ་འབར་མཚོ་དང་ འབྲུག་དབུས་ཕྱོགས་ཀྱི་ ས་གནས་མང་རབས་ཅིག་ནང་ ཞབས་བཅགས་ བྱིན་གྱིས་བརླབས་གནང་ཡོདཔ་ཨིན་པས།
རྒྱལ་ཁབ་ནང་ ཐེངས་༢ པ་ ཞབས་བཅགས་གནང་མི་དེ་ ཨྱོན་གུ་རུ་རིན་པོ་ཆེ་ བོད་བསམ་ཡས་ལྷ་ཁང་ བཞེངས་ཚར་ཏེ་ བོད་ལས་ལོག་བྱོན་པའི་སྐབས་ཨིནམ་བཞིན་དུ་ དེ་བསྒང་ བཀྲིས་གཡང་རྩེ་ལུ་ ཨོཾ་སྦ་གནས་དང་ མོང་སྒར་ལུ་ ཨཱ༔ བརྒྱ་གནས་ དེ་ལས་ ལྷུན་རྩེ་ལུ་ སེངྒེ་རྫོང་ལ་སོགས་པའི་ སྦས་གནས་ཁྱད་པར་ཅན་༡༠ དེ་ཅིག་ ཞབས་ཀྱིས་བཅགས་ བྱིན་གྱིས་བརླབས་གནང་ཡོདཔ་ཨིན་པས།
དེ་ལས་ ཨྱོན་གུ་རུ་རིན་པོ་ཆེ་དང་ མཁའ་འགྲོ་ཡེ་ཤེས་མཚོ་རྒྱལ་༢ སྤ་རོ་སྟག་ཚང་ལུ་ འཕུར་བྱོན་ཡོདཔ་བཞིན་དུ་ དེ་ཁར་ སྤ་རོ་བྲག་དཀར་པོ་དང་རྫོང་བྲག་ ར་རྒོད་ ཆིམ་ཕུག་ སྦས་ཡུལ་རིན་ཆེན་གཤོང་ཚུ་ནང་ ཞབས་ཀྱིས་བཅགས་ཏེ་ བྱིན་གྱིས་བརླབས་གནང་པའི་ཤུལ་ལས་ ལྷོ་ནུབ་ཧཱ་གསང་སྦས་ཁ་ཚུན་ བྱོན་ཞིནམ་ལས་ གུ་རུ་རིན་པོ་ཆེ་དང་ མཁའ་འགྲོ་ཡེ་ཤེས་མཚོ་རྒྱལ་༢ ཇོ་མོ་ལྷ་རི་ལས་སྦེ་ ལོག་བོད་ལུ་ འཕུར་བྱོན་ཡོད་པའི་ ལོ་རྒྱུས་འདུག།
ཨྱོན་གུ་རུ་རིན་པོ་ཆེ་གིས་ རྒྱལ་ཁབ་ནང་ ཐེངས་༣ པ་ ཞབས་བཅགས་གནང་མི་དེ་ མཇུག་ཨིནམ་ད་ དེ་བསྒང་ ལྷོ་ནུབ་སྲིན་པོའི་གཡུས་ལུ་ བྱོན་ཡོདཔ་བཞིན་དུ་ ཐིམ་ཕུག་དང་ སྤུ་ན་ཁ་ དེ་ལས་ དབང་འདུས་ཕོ་བྲང་གི་ ས་གནས་ཚུ་ནང་ སྦས་གནས་ཁྱད་པར་ཅན་༢༡ དེ་ཅིག་ བྱིན་གྱིས་བརླབས་གནང་པའི་ཤུལ་ལས་ དར་དཀར་ནང་དང་ མཐའ་ནམ་མཁའ་རྫོང་ སྦས་ཡུལ་སྒོམ་བྲག་བརྒྱུད་དེ་ ལྷོ་ཕྱོགས་ཁ་ཐུག་ བྱོན་ཡོདཔ་ཨིན་པས།
སྤ་རོ་སྟག་ཚང་དེ་ སྤྱི་ལོ་༧༤༧ ལས་ ཡོངས་གྲགས་སོང་མི་དེ་ཡང་ དེ་བསྒང་ གུ་རུ་གིས་ སྐུ་ཁྲོ་བོ་སྦེ་ རྡོ་རྗེ་གྲོ་ལོད་ལུ་ སྤྲུལ་ཐོག་ལས་ རྟ་གུ་ཆིབས་ཏེ་ ས་ཁོངས་དེ་ནང་ བྱོན་ཞིནམ་ལས་ ལུང་ཕྱོགས་དེ་ནང་ འདྲེ་གདོན་འབྱུང་པོ་ཚུ་ དམ་བཏགས་པའི་ཤུལ་ལས་ ད་རེས་ དཔལ་ཕུག་ལྷ་ཁང་བཞེངས་སའི་ བྱག་ཕུག་བྱིན་རླབས་ཅན་དེ་ནང་ སྒྲུབ་པ་གནང་སྟེ་ བཞུགས་མི་ལུ་བརྟེན་ཨིན་པས།
གསང་སྔགས་ཀྱི་ ཆོས་འབྱུང་དང་འཁྲིལཝ་ད་ ས་གནས་ཀྱི་གནས་བདག་ དམ་བཏགས་གནང་མི་ཚུ་ ནང་པ་སངས་རྒྱས་པའི་ སྲུང་མ་སྦེ་ བསྐོས་གནང་མིའི་གྲས་ལས་༡ ད་རེས་ནངས་པར་ སེངྒེ་བསམ་གྲུབ་དེ་ སྟག་ཚང་གི་ བཀའ་སྲུང་སྦེ་ ངོས་འཛིན་འབདཝ་ཨིན་པས།
དེ་བཟུམ་སྦེ་ ཨྱོན་གུ་རུ་གིས་ ལྷོན་མོན་ལྗོངས་ཀྱི་ དུས་ངན་སྙིགས་མའི་ སེམས་ཅན་ཚུ་གི་ སྡུག་བསྔལ་སྐྱབས་ནིའི་ ཞལ་གྱིས་བཞེས་གནངམ་ལས་ སྤྲེལ་ཟླ་ཚེས་བཅུའི་སྐབས་ ཨྱོན་གུ་རུ་རིན་པོ་ཆེ་ལུ་ དད་མོས་ཆེན་པོའི་ཐོག་ལས་ གསོལ་བ་བཏབ་པ་ཅིན་ ཚེ་འདི་ཕྱི་༢ ཆ་ར་ལུ་ བྱིན་རླབས་དང་ དངོས་གྲུབ་འཐོབ་ནི་ཨིན་མས་ཟེར་ ཞུ་ནི་ཨིན།

བསམ་གྲུབ་ལྗོངས་མཁར་ལས་ སྐལ་བཟང་དབང་ཕྱུག།

 

About admin

Check Also

སྤྱི་ལོ་༢༠༤༠ འི་ནང་འཁོད་ལུ་ ནང་འཁོད་གློག་མེའི་སྤྱོད་ཁྲལ་ ཡུ་ནིཊ་རེ་ལུ་ དངུལ་ཀྲམ་༤.༥༡ ལུ་ ལྷོད་ནིའི་དམིགས་གཏད།

༉ ནང་འཁོད་གློག་མེའི་སྤྱོད་ཁྲལ་གྱི་ དམིགས་གཏད་སྙན་ཞུ་དང་འཁྲིལ་བ་ཅིན་ ཆུ་ལུ་བརྟེན་པའི་གློག་མེ་ ཁ་སྐོང་མེ་ག་ཝཱཊ་༢,༠༠༠ ལྷགཔ་ཅིག་ ཐོན་སྐྱེད་འབད་ནིའི་ འཆར་གཞི་ཡོད་མི་དང་བསྟུན་ སྤྱི་ལོ་༢༠༤༠ འི་ནང་འཁོད་ལུ་ ནང་འཁོད་སྤྱོད་ཁྲལ་ཡུ་ནིཊ་རེ་ལུ་ དངུལ་ཀྲམ་༤.༥༡ ལུ་ ལྷོད་ནིའི་དམིགས་གཏད་ཨིན་པས། དཔེ་འབད་བ་ཅིན་ …

Leave a Reply

Your email address will not be published. Required fields are marked *