སྲིད་ཚོགས་གཉིས་མཉམ་བསྡོམས་འབད་འབདཝ་མེདཔ།

༉ འབྲུག་ཕུན་སུམ་ཚོགས་པ་གིས་ སླབ་མི་དང་འཁྲིལ་བ་ཅིན་ ཁོང་གི་ཚོགས་པ་དེ་ འབྲུག་སྤྱིར་དབང་ཚོགས་པ་དང་གཅིག་ཁར་ མཉམ་བསྡོམས་འབད་འབདཝ་མེན་ནི་དེ་གིས་ མཉམ་བསྡོམས་ཀྱི་སྐོར་ལས་ ལོ་རྒྱུས་ཐོན་མི་ཚུ་ མི་བདེན་ཟེར་ཨིན་པས།
དེ་ཡང་ གནད་དོན་དེའི་ཐད་ཁར་ ཁ་ཙ་ འབྲུག་ཕུན་སུམ་ཚོགས་པ་གིས་ གནས་ཚུལ་གསར་བཏོན་འབད་མི་དང་འཁྲིལཝ་ད་ ཆ་མེད་སོང་མི་ འབྲུག་སྤྱིར་དབང་ཚོགས་པའི་གཙོ་འཛིན་བགྲེསཔ་ ལི་ལི་དབང་ཕྱུག་དེ་ འབྲུག་ཕུན་སུམ་ཚོགས་པའི་ བྱང་ཐིམ་ཕུག་གི་འཐུས་མི་སྦེ་ བཅའ་མར་གཏོགས་ནིའི་ གོ་སྐབས་བྱིན་ཡོདཔ་མ་གཏོགས་ ཚོགས་པ་༢ མཉམ་བསྡོམས་འབད་ནིའི་ཐད་ཁར་ ལོ་རྒྱུས་ག་ནི་ཡང་ མེད་ཟེར་ཨིན་པས།
དེ་འབདཝ་ད་ ལི་ལི་དབང་ཕྱུག་གིས་ མོ་གི་ཚོགས་པ་དེ་ ཆ་མེད་སོང་བའི་ཤུལ་ལས་ བརྡ་བརྒྱུདཔ་ཚུ་ལུ་ སླབ་མིའི་ནང་ སྲིད་ཚོགས་༢ མཉམ་བསྡོམས་འབད་ཡི་ཟེར་ཨིན་པས།
འབྲུག་སྤྱིར་དབང་ཚོགས་པ་དེ་ འབྲུག་གི་བཙག་འཐུ་ལྷན་ཚོགས་ཀྱིས་ སྤྱི་ཟླ་༢ པའི་ཚེས་༢༦ ལུ་ སྲིད་དོན་ཚོགས་པའི་གྲས་ལས་ ཕྱིར་བཏོན་འབད་བའི་ཤུལ་ལས་ ལི་ལི་དབང་ཕྱུག་དེ་ འབྲུག་ཕུན་སུམ་ཚོགས་པའི་ བྱང་ཐིམ་ཕུག་གི་འཐུས་མི་སྦེ་ ཐོ་བཀོད་འབད་ནུག།
འབྲུག་ཕུན་སུམ་ཚོགས་པའི་གནས་ཚུལ་ གསར་བཏོན་ནང་ ལི་ལི་དབང་ཕྱུག་དང་ མོ་གི་མཉམ་རོགས་ལ་ལོ་ཅིག་ ཚོགས་པ་དེ་ནང་འཛུལ་ནིའི་ སྤྲོ་བ་བསྐྱེད་པ་ཅིན་ ཧེ་མ་ར་ ཚོགས་པ་དེ་ ཆ་མེད་གཏང་དགོཔ་མ་ཚད་ ཚོགས་པའི་ཁྱད་ཆོས་དང་ ལམ་ལུགས་དང་བསྟུན་དགོ་ཟེར་བཀོད་ནུག།
འབྲུག་ཕུན་སུམ་ཚོགས་པ་གིས་འབད་བ་ཅིན་ འབྲུག་སྤྱིར་དབང་ཚོགས་པ་ ཆ་མེད་སོང་བའི་ཤུལ་ལས་ ལི་ལི་དབང་ཕྱུག་མ་གཏོགས་ འཛུལ་ནིའི་སྤྲོ་བ་བསྐྱེད་མི་གཞན་ མ་ཐོན་མ་ཚད་ འབྲུག་ཕུན་སུམ་ཚོགས་པའི་ཧོངས་ལས་ཡང་ ཁོང་ཆ་ཁྱབ་ འཛུལ་དགོཔ་སྦེ་ མ་སླབ་ཟེར་ཨིན་པའི་གནས་ཚུལ།

བསྟན་འཛིན་རྣམ་རྒྱལ།

 

About admin

Check Also

སྣུམ་འཁོར་ཤུགས་ཚད་དང་ལྡནམ་སྦེ་གཏང་དགོ་པའི་ཞུ་བ།

༉ ཤར་ཕྱོགས་དང་ ནུབ་ཕྱོགས་ཀྱི་བར་ན་ གཞུང་ལམ་རྒྱ་སྐྱེད་འབད་དོ་ཡོདཔ་ལས་ ཕར་ཚུར་རྒྱུན་འགྲུལ་འཐབ་མི་ཚུ་ལུ་ དུས་ཡུན་མར་ཕབ་འབད་ནི་དང་ སྣུམ་འཁོར་ཚུ་ཡང་ འཁོར་ལམ་ལེགས་ཤོམ་ནང་ འགྲོ་འགྲུལ་འབད་ནིའི་ གོ་སྐབས་ཡོདཔ་ལས་ ག་རང་ལུ་ ཁེ་ཕན་བྱུང་ཡོདཔ་ཨིན་རུང་ སྣུམ་འཁོར་ཤུགས་ཚད་དང་ལྡནམ་སྦེ་ མ་གཏང་པ་ཅིན་ ཐུག་རྐྱེན་འབྱ྄ང་ཉེན་སྦོམ་འདུག་ཟེར་ཞུ་ནི། …

Leave a Reply

Your email address will not be published. Required fields are marked *