མི་དབང་མངའ་བདག་རིན་པོ་ཆེ་མཆོག་དང་ མི་དབང་འབྲུག་རྒྱལ་༤ པ་མཆོག་གིས་ ཞབས་དྲུང་སྐུ་མཆོད་སྐབས་ སྤུ་ན་ཁ་རྫོང་ནང་ སྨོན་ལམ་བཏབ་པར་འགྱོ་མི་ཚུ་དང་ མཇལ་ཕྲད་གནང་པའི་བསྒང་།

སྤུ་ན་ཁ་ལུ་ འབྲུག་རྒྱལ་འཛིན་མེ་ཏོག་འགྲེམ་སྟོན་ཐེངས་༤ པ་ འགོ་འབྱེད་འབད་ཡོདཔ།

༉ སྤྱི་ཟླ་༤ པའི་ཚེས་༢༥ ལུ་ སྤུ་ན་ཁ་རྫོང་གི་ཉེ་འདབས་ ཐང་བཟང་ནང་སྦེ་ འགོ་འདྲེན་འཐབ་མི་ འབྲུག་རྒྱལ་འཛིན་མེ་ཏོག་འགྲེམ་སྟོན་ཐེངས་༤ པའི་ འགོ་འབྱེད་ནང་ མི་དབང་མངའ་བདག་རིན་པོ་ཆེ་མཆོག་དང་ མི་དབང་འབྲུག་རྒྱལ་༤ པ་ མི་དབང་རྒྱལ་བཙུན་ དེ་ལས་ མི་དབང་སྐུ་འཁོར་ལྷན་རྒྱས་ཚུ་གིས་ གྲལ་གཏོགས་གནང་ཡི།
དུས་ཅི་གི་ མེ་ཏོག་འགྲེམ་སྟོན་དེ་ རྒྱ་འབྲུག་༢ ཀྱི་བར་ན་ དོན་གཅོད་མཐུན་ལམ་གཞི་བཙུགས་འབད་དེ་ མི་ལོ་༥༠ འཁོར་བའི་ དུས་སྟོན་བརྩི་སྲུང་འབད་ནིའི་དོན་ལུ་ཨིནམ་ད་ འབྲུག་ལུ་ རྒྱ་གར་གྱི་གཞུང་ཚབ་ཀྱིས་ཡང་ མེ་ཏོག་འགྲེམ་སྟོན་ འགོ་འབྱེད་གནང་སར་ བཅའ་མར་གཏོགས་ཡོདཔ་ཨིན་པས།
དེ་བཟུམ་སྦེ་ མེ་ཏོག་འགྲེམ་སྟོན་ནང་ ཐིམ་ཕུག་ལུ་ཡོད་མི་ འབྲུག་ལུ་ རྒྱ་གར་གྱི་གཞུང་ཚབ་ཡིག་ཚང་གིས་ བཟོ་སྟེ་ཡོད་མི་ མེ་ཏོག་ལྡུམ་ར་ཚུ་ཡང་ ཡོདཔ་ཨིན་པས།
འབྲུག་གི་བློན་ཆེན་དང་ གཞུང་གི་ཆེ་མཐོའི་འགོ་དཔོན་ དེ་ལས་ ཕྱི་རྒྱལ་གྱི་འགོ་དཔོན་ཚུ་གིས་ཡང་ མེ་ཏོག་འགྲེམ་སྟོན་ནང་ བཅའ་མར་གཏོགས་ཡོདཔ་ཨིན་པས།

མི་དབང་རྒྱལ་སྲས་མཆོག་ འབྲུག་རྒྱལ་འཛིན་མེ་ཏོག་འགྲེམ་སྟོན་ནང་ བཞུགས་པའི་བསྒང་།

མེ་ཏོག་འགྲེམ་སྟོན་དེ་ ཐང་བཟང་ནང་ ས་ཆ་ཨེ་ཀར་༩.༥ ནང་ འགོ་འདྲེན་འཐབ་ཡོདཔ་ཨིན་པས།
གཞུང་གི་ངོ་ཚབ་ལས་སྡེ་དང་ ཚོང་ལསཔ་ དེ་ལས་ རྒྱ་གར་དང་ ཐའི་ལེནཌི་ལས་ བཅའ་མར་གཏོགས་མི་ཚུ་གིས་ བརྗོད་དོན་བཀོད་ཡོད་པའི་ མེ་ཏོག་ལྡུམ་ར་ཚུ་ གཞི་བཙུགས་འབད་ཡོདཔ་ཨིན་པས།
གནམ་བྱཱར་ སྤུ་ན་ཁ་ལུ་སྡོད་མི་ གཞུང་གྲྭ་ཚང་གི་ དགེ་སློང་ཚུ་གིས་ཡང་ སྤུ་ན་ཁ་སློབ་གྲྭ་ལྟེ་བ་དང་ ཨྱོན་རིག་པའི་འབྱུང་གནས་དང་གཅིག་ཁར་ མེ་ཏོག་འགྲེམ་སྟོན་ནང་ བཅའ་མར་གཏོགས་ཡོདཔ་ད་ ཁོང་གིས་དེ་བཟུམ་སྦེ་ བཅའ་མར་གཏོགས་མི་དེ་ འགོ་དང་པ་ཨིན་པས།།
བརྗོད་དོན་ཐོག་ལས་ བཟོ་སྐྲུན་འབད་དེ་ཡོད་མི་ ལྡུམ་ར་ཚུ་ འགྲེམ་སྟོན་མཇུག་བསྡུ་བའི་ཤུལ་ལས་ ས་གནས་དེ་ཁར་ར་ རང་འཇགས་བཞག་ནི་ཨིན་པས།
སྤུ་ན་ཁ་རྫོང་གི་མཐའ་འཁོར་ལུ་ སའི་ཆགས་ཚུལ་གྱི་ འཆར་གཞི་ཚུ་ཡང་ སོ་ནམ་དང་ནགས་ཚལ་ལྷན་ཁག་གིས་ ལམ་སྲོལ་ལས་ཁུངས་དང་ སྤུ་ན་ཁ་རྫོང་ཁག་བདག་སྐྱོང་དང་གཅིག་ཁར་ གྲོས་བསྟུན་འབད་ཐོག་ལས་ གོང་འཕེལ་བཏང་ཡོདཔ་ཨིན་པས།


རྒྱལ་འཛིན་མེ་ཏོག་འགྲེམ་སྟོན་ལས་རིམ་དེ་ ངོ་ཚབ་ལས་སྡེ་དང་ ཚོང་ལསཔ་ རྒྱལ་སྤྱིའི་བཅའ་མར་གཏོགས་མི་ ཐའི་ལེནཌི་གི་ རྒྱབ་སྐྱོར་ཐོག་ལས་ སོ་ནམ་དང་ནགས་ཚལ་ལྷན་ཁག་གིས་ འཛིན་སྐྱོང་འཐབ་ཡོདཔ་ཨིན་པས།
རྒྱལ་འཛིན་མེ་ཏོག་འགྲེམ་སྟོན་ལས་རིམ་དེ་ མི་དབང་མངའ་བདག་རིན་པོ་ཆེ་མཆོག་གིས་ བཀའ་རྒྱ་གནང་མི་དང་བསྟུན་ འགོ་བཙུགས་ནུག།
དེ་སྦེ་ འགོ་འདྲེན་འཐབ་དགོ་པའི་ དམིགས་ཡུལ་དེ་ཡང་ རྒྱལ་ཁབ་ཀྱི་ མི་མང་ཡོངས་ གཅིག་ཁར་སྤུངས་འཛོམས་འབད་ཚུགས་པའི་ གོ་སྐབས་བཟང་པོ་ཅིག་དང་ མི་མང་གི་ས་ཁོངས་ཚུ་ མཛེས་ཆ་དང་ལྡནམ་སྦེ་བཟོ་ནི་ མེ་ཏོག་ལུ་གཙོ་བོར་བཏོན་མི་ ཚོང་པ་ཚུ་ ཁོང་རའི་མེ་ཏོག་ཚུ་ གསལ་སྟོན་འབད་ཚུགས་པའི་ གོ་སྐབས་འཐོབ་ནིའི་དོན་ལུ་ཨིན་པས།
འབྲུག་རྒྱལ་འཛིན་མེ་ཏོག་འགྲེམ་སྟོན་ འགོ་དང་པ་དེ་ སྤྱི་ལོ་༢༠༡༥ གི་ ཟླཝ་༤ པའི་ནང་ སྤ་རོ་ཨྱོན་དཔལ་རི་ཕོ་བྲང་ནང་སྦེ་ འགོ་འདྲེན་འཐབ་ནུག།


མི་དབང་རྒྱལ་ཡུམ་ ཚེ་རིང་གཡང་སྒྲོན་དབང་ཕྱུག་མཆོག་ འབྲུག་རྒྱལ་འཛིན་མེ་ཏོག་འགྲེམ་སྟོན་གྱི་ སྐྱབས་འཛིན་ཨིནམ་ལས་ ལོ་བསྟར་བཞིན་དུ་ མེ་ཏོག་འགྲེམ་སྟོན་ འགོ་འདྲེན་འཐབ་པའི་སྐབས་ མི་དབང་རྒྱལ་ཡུམ་མཆོག་གིས་ཡང་ ཕྱག་ལཱ་ཚུ་ མཛད་གནངམ་ཨིན་པས།
དེ་ཚེ་དྲོ་པ་ མི་དབང་འབྲུག་རྒྱལ་༤ པ་མཆོག་དང་ མི་དབང་སྐུ་འཁོར་ལྷན་རྒྱས་ཚུ་གིས་ ཞབས་དྲུང་སྐུ་མཆོད་ བརྩི་སྲུང་ཞུ་ནིའི་དོན་ལུ་ སྤུ་ན་ཁ་རྫོང་ཁག་ནང་ ཐུགས་སྨོན་གནང་ཡོདཔ་ ཨིན་པའི་གནས་ཚུལ།

ཡེ་ཤེས་སྒྲོལ་མ།

 

About admin

Check Also

རྩི་རང་གི་ ས་གནས་གཞུང་གི་བཙག་འཐུའི་ནང ཁས་བླངས་གཙོ་བོ་ ཆུའི་དཀའ་ངལ་སེལ་ཐབས་འབད་ནི།

༉ རྩི་རང་སྟོད་ཀྱི་ ས་གནས་གཞུང་གི་འདེམས་ངོ་སྦེ་ གདམ་འཐུ་གྲུབ་མི་༡༡ ཡོདཔ་བཞིན་དུ་ ག་རང་གིས་ ཆུའི་དཀའ་ངལ་བསལ་ནི་ལུ་ གཙོ་རིམ་བཟུང་ཡོདཔ་མ་ཚད་ ཞིང་ཆུ་ལངམ་སྦེ་ མཁོ་སྤྲོད་འབད་ནི་ཨིན་པས། ཨིན་རུང་ ཚོགས་རྒྱན་བཙུགས་མི་ཚུ་གིས་འབད་བ་ཅིན་ ཧེ་མ་ཡང་ འདེམས་ངོ་ཚུ་ བཙག་འཐུ་གྲུབ་ཞིནམ་ལས་ …

Leave a Reply

Your email address will not be published. Required fields are marked *