སྔ་ཚང་རྒེད་འོག་ནང་ ས་སྣུམ་བཀྲམ་སྤེལ་ཁང་ འགོ་འབྱེད་འབད་ཡོདཔ།

ཁ་ཙ་ སྔ་ཚང་རྒེད་འོག་ནང་ ས་སྣུམ་བཀྲམ་སྤེལ་ཁང་ཆུང་བ་ཅིག་ གཞུང་འབྲེལ་ཐོག་ འགོ་འབྱེད་འབད་མི་ལུ་བརྟེན་ རྒེད་འོག་གི་མི་སེར་ཚུ་མ་ཚད་ ཉེ་འདབས་ཀྱི་ རྒེད་འོག་༦ གི་ མི་སེར་ཚུ་ལུ་ཡང་ ཕན་ཐོགས་སྦོམ་སྦེ་ར་ བྱུང་ཡོདཔ་ཨིན་པས།

འགོ་འབྱེད་འབད་ཚརཝ་ཅིག་ སྣུམ་འཁོར་གྱི་ ཇོ་བདག་ཚུ་གིས་ རང་སོའི་སྣུམ་འཁོར་ནང་ ས་སྣུམ་བླུགས་ཡོདཔ་མ་ཚད་ སོ་ནམ་པ་ཚུ་གིས་ མེ་རླུང་གེས་རྒྱ་རྫི་སོར་བར་ འབག་འོང་ཡོདཔ་ཨིན་པས།

སོ་ནམ་པ་ པདྨ་གཡང་འཛོམས་ཀྱིས་ སླབ་མིའི་ནང་ སྔ་ཚང་རྒེད་འོག་ལས་ ས་སྣུམ་ག་ཅི་ར་འབག་རུང་ མེ་རླུང་རྒྱ་རྫི་ཚུ་ སོར་ནིའི་དོན་ལུ་ མོང་སྒར་ཁྲོམ་ཚུན་ ཉིནམ་༡ དུས་ཚོད་འཕྲོ་བརླག་གཏངམ་མ་ཚད་ ཟད་འགྲོ་གནསཔ་ཨིན་ཟེར་ཨིན་པས།

སྔ་ཚང་རྒཔོ་ རྡོ་རྗེ་ལས་སྐྱིད་ཀྱིས་ སླབ་མི་དང་འཁྲིལཝ་ད་ ས་སྣུམ་བཀྲམ་སྤེལ་ཁང་ གཞི་བཙུགས་འབད་མི་དེ་གིས་ རྒེད་འོག་གི་མི་སེར་ཚུ་མ་ཚད་ དགྲ་མེད་རྩེ་སྔ་ཚང་འདེམས་ཁོངས་ཀྱི་ མི་སེར་ཚུ་ལུ་ཡང་ ལྷན་ཐབས་འབྱུང་ཚུགས་ཟེར་ཨིན་པས།

དེ་ཡང་ ཤེར་མུ་ཧཱུྂ་རྒེད་འོག་དང་ ལྕགས་སི་མཁར་ ཐང་རོང་ བ་ལམ་ དགྲ་མེད་རྩེ་ དེ་ལས་ ན་རང་རྒེད་འོག་གི་ མི་སེར་ཚུ་ལུ་ ཕན་ཐོགས་འབྱུང་ནི་ཨིན་པས།

ལྷག་པར་དུ་ རྒཔོ་རྡོ་རྗེ་ལེགས་སྐྱིད་ཀྱིས་འབད་བ་ཅིན་ ས་སྣུམ་བཀྲམ་སྤེལ་ཁང་ གཞི་བཙུགས་འབད་མི་དེ་གིས་ དབུལ་ཕོངས་ཀྱི་དཀའ་ངལ་བསལ་ནི་ལུ་ ཕན་ཐོགས་འབྱུང་ནི་དང་ དངུལ་ཐོག་འོང་འབབ་བཟོ་ཚུགས་ནི་ དེ་ལས་ མི་སེར་ཚུ་གི་ དཔལ་འབྱོར་གོང་འཕེལ་གཏང་ཚུགས་ཟེར་ སླབ་ཨིན་པས།

ལུང་ཕྱོགས་ཚོང་དང་བཟོ་གྲྭ་ཡིག་ཚང་གི་ མདོ་ཆེན་ངོ་ཚབ་ ཀརྨ་ཚེ་དབང་རིག་འཛིན་གྱིས་ སླབ་མིའི་ནང་ སྔ་ཚང་རྒེད་འོག་ནང་ ས་སྣུམ་བཀྲམ་སྤེལ་ལས་ཁང་ གཞི་བཙུགས་འབད་མི་དེ་ སོ་ནམ་འཕྲུལ་ཆས་ལས་འཛིན་ཚད་དང་ བསྟན་རྒྱས་ལྷན་ཁག་༢ ཀྱིས་ མཉམ་འབྲེལ་ཐོག་ལས་ རྒྱབ་སྐྱོར་འབད་ཡི་ཟེར་ཨིན་པས།

མོང་སྒར་རྫོང་ཁག་ནང་ དེ་བཟུམ་མའི་ ས་སྣུམ་བཀྲམ་སྤེལ་ཁང་༡༠ གཞི་བཙུགས་འབད་ནིའི་ འཆར་གཞི་ཡོད་མི་ལས་ འགོ་དང་པ་ སྔ་ཚང་རྒེད་འོག་ནང་ གཞི་བཙུགས་འབད་ཡི་ཟེར་ མདོ་ཆེན་ངོ་ཚབ་ ཀརྨ་ཚེ་དབང་རིག་འཛིན་གྱིས་ སླབ་ཨིན་པས།

ད་ལྟོ་ཚུན་ མོང་སྒར་དང་ ཀྲོང་གསར་ དབང་འདུས་ དེ་ལས་ གཞལམ་སྒང་རྫོང་ཁག་ཚུ་གི་ རྒེད་འོག་༤ ནང་ ས་སྣུམ་བཀྲམ་སྤེལ་ཁང་ གཞི་བཙུགས་འབད་ཡོདཔ་བཞིན་དུ་ ལག་ལེན་འཐབ་པའི་བསྒང་ཡོད་པའི་གནས་ཚུལ།

མོང་སྒར་ལས་ བཀྲིས་ཕུན་ཚོགས།

About admin

Check Also

དགེ་ལེགས་ཕུག་ལུ་ ཆུ་རུད་བཀག་ཐབས་ཀྱི་ ཆུ་བྱག་དང་ ཆུ་ལམ་ལེགས་བཅོས་འབད་ནི།

ཁྲོམ་སྡེ་གིས་ ལོ་ཕྱེད་ཀྱི་ འཆར་དངུལ་བསྐྱར་ཞིབ་སྐབས་ ཉེན་ཅན་ས་ཁོངས་ཚུ་ནང་ ཆུ་རུད་བཀག་ཐབས་ཀྱི་ གཙོ་རིམ་སྒྲིག་ནི་ཨིན་པས། ༉ གནམ་བྱཱར་གྱི་སྐབས་ ཆུ་རུད་ལས་ ཉེན་སྐྱོབ་འབད་མི་ ཆུ་བྱག་ཚུ་ རམ་ཡར་སོཔ་ལས་ དགེ་ལེགས་ཕུག་ ནམ་མཁའ་གླིང་འདེམས་ཁོངས་ནང་ ཨའི་པོ་ལི་རོང་ཆུའི་ …

Leave a Reply

Your email address will not be published. Required fields are marked *