སྤུར་སྦྱང་གི་དོན་ལུ་ བཅའ་སྒྲིག་ཚུ་ རྐྱབ་པའི་བསྒང་།

མཁན་པོ་དཀར་པོའི་སྐུ་གདུང་ འཕྲལ་མགྱོགས་ར་ སྤུར་སྦྱང་ཕུལ་ནི།

༉ ཞིང་གཤེགས་མཁན་པོ་དཀར་པོའི་ སྐུ་གདུང་དེ་ རང་ཟླ་༣ པའི་ཚེས་༣༠ ལུ་ སྤུར་སྦྱང་ཕུལ་ནི་ཨིནམ་ལས་ ད་ལྟོ་ གྲྭ་ཚང་གི་ དགེ་སློང་ཚུ་གིས་ བཅའ་སྒྲིག་ཚུ་ རྐྱབ་པའི་བསྒང་ར་འདུག།
མཁན་པོ་དཀར་པོ་དེ་ སྤྱི་ཟླ་༡ པའི་ཚེས་༡༩ ལུ་ ཞིང་ཕེབས་པའི་ཤུལ་ལས་ ཐུགས་དམ་ནང་ ཟླཝ་༤ གི་རིང་ བཞུགས་ཡོདཔ་བཞིན་དུ་ ཐའི་ལེནཌེ་བེང་ཀོག་ལས་ རྒྱལ་ཁབ་ནང་ གདན་འདྲེན་ཞུ་ཐོག་ལས་ ལྷུན་རྩེ་སྟག་སྐད་ལ་ གུ་རུ་སྣང་སྲིད་ཟིལ་གནོན་གྱི་ ལྷ་ཁང་ནང་སྦེ་ གདན་འདྲེན་ཞུ་སྟེ་ བཞག་ཡོདཔ་ཨིན་པས།
གུ་རུའི་འོག་གི་ ལྷ་ཁང་ནང་སྦེ་ སྐུ་གདུང་བཞག་པའི་སྐབས་ བླམ་རྣམ་གྲོལ་བཟང་པོ་གིས་ དབུ་བཞུགས་ཐོག་ སྤྲུལ་སྐུ་དང་ དགེ་སློང་ཞལ་གྲངས་༡༠༠ དེ་ཅིག་གིས་ ཞག་གྲངས་༤༩ ཚུན་ ཀར་གླིང་ཞི་ཁྲོའི་ གསུང་ཆོག་གནང་ཡོདཔ་ཨིན་པས།
དེ་གི་ཤུལ་ལས་ ཨྱོན་མདོ་སྔགས་འོད་གསལ་ཆོས་གླིང་ གྲྭ་ཚང་གི་ དགེ་སློང་ཚུ་གིས་ སྨོན་ལམ་དང་ རྡོར་སེམས་ དེ་ལས་ བཤགས་པ་ཚུ་ རྒྱུན་མ་ཆད་པར་ བཏང་ཡི་ཟེར་ མཁན་པོ་རྒྱལ་མཚན་གྱིས་ སླབ་ཨིན་པས།
སྨན་སྦིས་རྒཔོ་ཚུལ་ཁྲིམས་ཀྱིས་ སླབ་མིའི་ནང་ དེ་སྦེ་ སྤུར་སྦྱང་ཡུན་འགྱངས་ལུས་མི་དེ་ཡང་ རྫོང་གསར་འཇམ་དབྱངས་མཁྱེན་བརྩེ་རིན་པོ་ཆེ་མཆོག་ དལ་ཁོམ་མེད་མི་ལུ་བརྟེན་ ཨིན་ཟེར་ཨིན་པས།
སྐུ་གདུང་དེ་ བེང་ཀོག་ལས་ གདན་འདྲེན་ཞུ་བའི་ཤུལ་ལུ་ ཐིམ་ཕུག་ལུ་ བདུན་ཕྲག་༡ གི་རིང་བཞག་ཡོདཔ་ད་ དེ་ལས་ མོང་སྒར་བཀའ་གདམས་དགོན་པ་ལུ་ཞུ་སྟེ་ ཞག་༡ བཞག་ཡོདཔ་བཞིན་དུ་ ལྷུན་རྩེ་སྨད་མཚོ་ལུ་ མཁན་པོ་ཁོ་རའི་གདན་ས་ དཔལ་ཕུག་སྒྲུབ་གྲྭ་ནང་ ཞག་གྲངས་༣ བཞག་ཡོདཔ་ཨིན་པས།
མཁན་པོ་མཆོག་ ཞིང་ཕེབས་ཏེ་ ཉིན་གྲངས་༡༡༨ ལང་ཡོད་རུང་ སྐུ་གདུང་ལས་ དྲིམ་མེད་པའི་ཁར་ སྐུ་རུལ་ནིའི་ཚུལ་ ག་ནི་ཡང་མེདཔ་ད་ སྐུ་གདུང་ལུ་ སྨན་ཁབ་རྐྱབ་ནི་དང་ སྨན་བླུག་ནི་ ཚྭ་སོགས་ག་ནི་ཡང་ མ་བླུག་རུང་ ཡ་མཚན་ཆེ་ཏོག་ཏོ་སྦེ་ བཞུགས་ཡོདཔ་མཇལཝ་ཨིན་པས།
མཁན་པོ་མཆོག་གིས་ སྟག་སྐད་ལ་ལུ་ ཟད་འགྲོ་དངུལ་ཀྲམ་ས་ཡ་༧༠༠ བཏང་སྟེ་ རིང་ཚད་ཕིཊ་༡༥༧ འབད་མི་ གུ་རུ་སྣང་སྲིད་ཟིལ་གནོན་གྱི་ སྐུ་འདྲ་ཆེན་མོ་ བཞེངས་གནང་པའི་ཁར་ འབྲུག་ཨོ་ཌི་ཡ་ན་གཞི་ཚོགས་དང་ ཨྱོན་མདོ་སྔགས་འོད་གསལ་ཆོས་གླིང་གྲྭ་ཚང་ཡང་ གཞི་བཙུགས་གནང་ཡོད་པའི་གནས་ཚུལ།

སྟག་སྐད་ལ་ལས་ བཀྲིས་ཕུན་ཚོགས།

About admin

Check Also

རྒྱལ་ཁབ་ནང་ དཔུང་ཤུགས་འགྲན་བསྡུར་ཐེངས་༡ པ་ འགོ་འདྲེན་འཐབ་ཡོདཔ།

༉ ཆུ་ཁ་རྫོང་ཁག་ལས་ སྐྱེས་ལོ་༣༨ ལང་མི་ ལྷཔ་ཅུ་གིས་ ལག་པའི་དཔུང་ཤུགས་འགྲན་བསྡུར་ འགོ་འདྲེན་འཐབ་མིའི་ནང་ལས་ ཨང་དང་པ་ ཐོན་ཡོདཔ་ཨིན་པས། ཁོ་གིས་ མཐའ་བཅད་འགྲན་བསྡུར་དང་ མོང་སྒར་ལས་ སྐྱེས་ལོ་༢༩ ལང་མི་ པདྨ་དབང་འདུས་དང་གཅིག་ཁར་ …

Leave a Reply

Your email address will not be published. Required fields are marked *