རིན་ཆེན་བཀྲིས་ཀྱིས་ ཆུ་ཚ་ཏོམ་ནང་ ཉིན་གྲངས་༣ གྱི་རིང་ སྦང་བཞག་མི་ ཀོཝ་གི་རྩམ་ཁུག་ནང་ གཡག་གི་དར་ཚིལ་འདེགས་ཞིནམ་ལས་ ཁ་བཙེམ་པའི་བསྒང་།

དྲིམ་སྡུག་ཁིག་ཁི་ཡོད་རུང་ མེ་རགཔ་ཚུ་གི་ ཡོ་ཤ་དེ་ ཚོད་མའི་རྫས་སྦྱོར་རྡིག་ཤོས་ཅིག་ཨིནམ།

༉ བཀྲ་ཤིས་སྒང་རྫོང་ཁག་གི་ བྱང་ཕྱོགས་ཁ་ཐུག་ལུ་ ལ་མཐོ་སར་སྡོད་མི་ མེ་རག་གི་ མི་སེར་ཚུ་གི་ ཁ་སྐད་ནང་ ཡོ་ཤ་ཟེར་སླབ་མི་ ཟོས་ཏོས་དེ་ བཟའ་སྤྱོད་ཀྱི་རིགས་ ག་ཅི་ནང་ར་ཨིན་རུང་ ལག་ལེན་འཐབ་ཨིན་པས།
ཇ་སྐོལ་བའི་སྐབས་རྐྱངམ་གཅིག་ ལག་ལེན་འཐབ་ནི་མེད་མི་དེ་ ཟོས་ཏོས་དེ་ ས་ཁ་མཐོ་སར་སྡོད་མི་ མི་སྡེའི་དོན་ལུ་ དམིགས་བསལ་དང་ རིན་ཐང་ཅན་གྱི་ ཟས་རྡིག་ཤོས་ཅིག་སྦེ་ ཆ་བཞགཔ་ཨིན་པས།
ཡོ་ཤ་དེ་ དྲིམ་སྡུག་ཁིག་ཁི་འབད་མི་ དར་ཚིལ་རུལ་བཅུག་སྟེ་བཟོ་བའི་ རྫས་སྦྱོར་ཅིག་ཨིན་རུང་ གནམ་གཤིས་གནས་སྟངས་བསིལ་དྲགས་ནང་ སྡོད་མི་ཚུ་གིས་ རྒྱ་ཆེ་དྲགས་སྦེ་ ལག་ལེན་འཐབ་དོ་ཡོདཔ་ཨིན་པས།
བཟོས་འཐུད་ཟེར་ཡང་སླབ་མི་ ཟོས་ཏོས་བཟོ་ནིའི་དོན་ལུ་ དང་པ་ར་ རིག་རྩལ་དང་ ལག་སྦྱང་ཡོད་མི་ དགོ་པའི་ཁར་ ཟོས་ཏོས་ཁུག་བཅུག་སྟེ་ ཚོད་མའི་ནང་ བླུག་ནི་དང་ ཨེ་རྫས་ཀྱི་ རྫས་སྦྱོར་སྦེ་ ལག་ལེན་འཐབ་ནི་ གྲ་སྒྲིག་འགྱོ་ཚུགས་ཚུགས་ལུ་ ལོ་ལས་ལོ་སྦེ་ ཉམས་སྲུང་ཐོག་ བཞག་དགོ་དོ་ཡོདཔ་ད་ དྲི་ངན་ཅིག་ཨིན་མི་ ཟོས་ཏོས་དེ་ གཡག་གི་དར་ཚིལ་ལས་ བཟོཝ་ཨིན་པས།
མེ་རག་གཡུས་ཚན་ནང་ རིན་ཆེན་བཀྲིས་དེ་ ཟོས་ཏོས་བཟོ་སྟེ་ འདུ་འཛི་ཅན་སྦེ་སྡོད་སར་ མཐོང་མི་དེ་ཡང་ ཁོ་གིས་ ལགཔ་གིས་བཙེམས་མི་ ཀོཝ་གི་རྩམ་ཁུག་ཕྱེད་ཀ་ ཟོས་ཏོས་འདེགས་ཡོད་མི་དེ་ འཐུ་འབག་ཐོག་ལས་ ཐབ་ཀྱི་ཉེ་འདབས་ལུ་ ཆུ་ཚ་ཏོམ་ནང་ དུས་ཡུན་རིངམ་སྦེ་ སྦང་བཞག་པའི་ཤུལ་ལུ་ འགྲོས་ཀྱིས་སྦེ་ རྩམ་ཁུག་ཕྱེད་ཀ་མ་གང་པར་ཡོད་མིའི་ནང་ ཆུ་རྩ་ལས་མེད་མི་ དར་ཚིལ་ཚུ་ འདེགསཔ་ཨིན་པས།
ཀོཝ་གི་རྩམ་ཁུག་ ཆུ་ཚ་ཏོམ་ནང་ སྦང་དགོ་མི་དེ་ཡང་ དར་ཚུལ་འདེགས་པའི་ཤུལ་ལས་ རྩམ་ཁུག་གི་ ཁ་བཙེམ་ད་ འཇམ་ནི་དེ་གིས་ཨིན་རུང་ ཁ་བཙེམ་པའི་སྐབས་ དུས་ཡུན་ཆུ་ཚོད་༢ དེ་ཅིག་ འགོར་དོ་ཡོདཔ་ཨིན་པས།


རིན་ཆེན་བཀྲིས་ཀྱིས་འབད་བ་ཅིན་ དར་ཚིལ་གྱི་ཆུ་ བཙིར་མ་བཏང་པ་ཅིན་ ཤུལ་ལས་ ཟོས་ཏོས་ནང་ སྐྱོ་མ་ཐལ་ཏེ་ འབུབ་བཏག་ནིའི་ ཉེན་ཁ་ཡོད་ཟེར་ཨིནམ་ད་ ཟོས་ཏོས་བཟོ་ནི་དེ་ ལཱ་འཇམ་ཏོང་ཏོ་ཅིག་མེན་མི་དེ་ཡང་ ཀོཝ་གི་རྩམ་ཁུག་གང་ནིའི་དོན་ལུ་ དུས་ཡུན་ཆུ་ཚོད་གཉིས་དེ་ཅིག་ འགོརཝ་མ་ཚད་ དར་ཚིལ་ནང་ན་འདེགས་པའི་སྐབས་ཐོན་མི་ རིན་ཆེན་བཀྲིས་ཀྱི་ ལག་པའི་དྲེག་པ་གནག་ཏང་ཏ་ཚུ་ རྩམ་ཁུག་ནང་འཛུལཝ་ཨིན་པས།
རིན་ཆེན་བཀྲིས་ཀྱིས་ ཁོ་གི་ལག་པའི་དྲེག་པ་ ཟོས་ཏོས་ཀྱི་ རྩམ་ཁུག་ནང་ འཛུལ་མི་དེ་ གསང་བ་ཨིནམ་མ་ཚད་ ཟོས་ཏོས་ཀྱི་བཅུད་བཟོ་མི་ རྫས་སྦྱོར་ངོ་མ་ཅིག་ ལགཔ་ལས་འཛགས་མི་ དྲེག་པ་དེ་ཨིན་ཟེར་ དགའ་འཛུམ་དང་བཅསཔ་སྦེ་ བཤད་པའི་ཁར་ ཟོས་ཏོས་དེ་ ས་ཁ་མཐོ་སར་ སྡོད་མི་ཚུ་གི་དོན་ལུ་ ཤ་བ་ལྷགཔ་སྦེ་ རིན་ཐང་ཆེ་ཟེར་ སླབ་ཨིན་པས།
དེ་མ་ཚད་ མི་སྡེའི་དོན་ལུ་ ཟོས་ཏོས་དེ་ འོང་འབབ་ཀྱི་ཐོན་ཁུངས་ གཙོ་ཅན་ཅིག་ཡང་ཨིན་ཟེར་ ཁོ་གིས་ བཤདཔ་ཨིན་པས།
མེ་རག་ལུ་ སྡོད་མི་ཚུ་གིས་ ཟོས་ཏོས་དེ་ སྤྱི་ཟླ་༣ པ་དང་༡༠ པའི་བར་ན་ བཟོ་དོ་ཡོདཔ་ད་ ཁ་བཙེམས་ཡོད་མི་ ཀོཝ་གི་རྩམ་ཁུག་དེ་ དུས་ཡུན་ཟླ་ངོ་༡ དེ་ཅིག་ ཐབ་སྐྱོར་ནང་བཞག་སྟེ་ དུས་རྒྱུན་དུ་ ལྟ་རྟོག་ཐོག་ལུ་ བཞག་དགོཔ་ཨིན་པས།
ཀོཝ་སྲ་ཀྲག་ཐལཝ་ཅིག་ ཐབ་སྐྱོར་ལས་ ཕྱི་ཁར་ལོ་༡ གི་ རིང་བཞགཔ་ད་ ནང་ན་ཡོད་མི་ དར་ཚིལ་དེ་ བཀྱག་སེར་ནག་ལུ་ འགྱུརཝ་ད་རྐྱངམ་ཅིག་ ཟོས་ཏོས་ཀྱི་བྲོ་དེ་ཡང་ ལེགས་ཤོམ་འགྱོ་འོང་ཟེར་ རིན་ཆེན་བཀྲིས་ཀྱིས་ བཤད་པའི་ཁར་ མི་ཚུ་གིས་ ལོ་ངོ་༣ ལྷགཔ་རེ་འགྱོ་མི་ ཟོས་ཏོས་ཚུ་ གདམ་ཁ་རྐྱབ་མས་ཟེར་ བཤདཔ་ཨིན་པས།
ད་ལྟོ་ གནམ་གཤིས་ཚ་དྲོད་དང་ལྡནམ་སྦེ་ ཡོད་མི་ལུ་བརྟེན་ ཟོས་ཏོས་ཚུ་ ལོ་༡ ནང་ར་ བཟོ་ཚུགས་ཟེར་ ཁོ་གིས་ བཤད་པའི་ཁར་ ད་རེས་བཟུམ་མའི་ དུས་ཚོད་ནང་ དུས་ཡུན་ལོ་ངོ་༡ ལས་ལྷགཔ་སྦེ་ བཞག་པ་ཅིན་ ནང་ན་ཡོད་མི་ དར་ཚིལ་ཚུ་ ཕྱེ་ལུ་གྱུར་ཏེ་ འབུབ་བཏགས་འོང་ཟེར་ བཤདཔ་ཨིན་པས།
ཟོས་ཏོས་ཉོ་མི་ མང་ཤོས་ར་ མེ་རག་གི་ཕྱི་ཁ་ལས་ ཐོན་དོ་ཡོདཔ་ད་ ལ་ནོར་གཡག་འཚོ་མི་ མང་ཤོས་ཀྱིས་ ཟླཝ་༥ དེ་རེ་ལང་མི་ ཟོས་ཏོས་ཚུ་ བཙོངམ་མས་ཟེར་ཨིན་པས།
ཁྲོམ་ཁར་བཙོང་ནི་ཡོད་མི་ ཟོས་ཏོས་ཚུ་ མང་ཤོས་ར་ ཟླཝ་༤ དེ་རེ་ ལང་མི་དང་ གོང་ཚད་ཡང་ ཀེ་ཇི་རེ་ལུ་ དངུལ་ཀྲམ་༤༠༠ དེ་རེ་སྦེ་ བཙོང་དོ་ཡོད་རུང་ ལེགས་ཤོམ་སྦེ་ བཟོ་མི་ཚུ་ དངུལ་ཀྲམ་༦༠༠ དེ་རེ་ ཐོབ་དོ་ཡོདཔ་ཨིན་པས།
དེ་ལས་ ལོ་༡ ལས་ལྷག་མི་ ཟོས་ཏོས་ཚུ་ ཁོང་ར་བཟའ་སྤྱོད་འབད་ནི་དང་ དམིགས་བསལ་གྱི་ དུས་སྟོན་བརྩི་སྲུང་སྐབས་ ལག་ལེན་འཐབ་ནིའི་དོན་ལུ་ བཞག་ནི་ཡོད་ཟེར་ རིན་ཆེན་བཀྲིས་ཀྱིས་ བཤདཔ་ཨིན་པས།
གོང་འཕེལ་གྱི་ འགྱུར་བ་དང་འཁྲིལ་ ས་ཁ་མཐོ་སར་ སྡོད་མི་ཚུ་གི་ འཚོ་བའི་གནས་སྟངས་ཡང་ ལེགས་བསྒྱུར་སོང་སྟེ་ཡོད་རུང་ ཟོས་ཏོས་བཟོ་ནི་དེ་ སྔར་ག་ཨིནམ་སྦེ་ར་ ཡོདཔ་ཨིན་པའི་གནས་ཚུལ།

སྐད་སྒྱུར་ བཀྲིས་བསྟན་འཛིན།

About admin

Check Also

མདའ་རྩེད་དེ་ སྲོས་ཀྱི་མི་སེར་ཚུ་གི་དོན་ལུ་ སྤྲོ་སྟོན་འབད་ནིའི་ དུས་ཚོད་ཅིག་ཨིནམ།

༉ ལ་གོང་གསུམ་གྱི་ མི་སེར་ཚུ་གི་དོན་ལུ་ ཕམ་སྤུན་ཆ་འཛོམས་ཏེ་ སྤྲོ་བ་སྟོན་ནིའི་ དུས་ཚོད་བཟང་པོ་ཅིག་ མདའ་རྩེད་འགྲན་བསྡུར་འབད་ནི་དེ་ཨིན་པས། དེ་འབདཝ་ལས་ ཁ་ཙ་ ཐིམ་ཕུག་སྲོས་རྒེད་འོག་ནང་ ཁཝ་འགོ་དང་པ་རྐྱབ་ཡོདཔ་ལས་ གྱང་ཤུགས་ཆེ་བའི་ཁར་ ཆརཔ་གིས་སྦང་རུང་ མདའ་རྩེདཔ་ཚུ་ལུ་ ཧེང་སྐལ་ར་ …

Leave a Reply

Your email address will not be published. Required fields are marked *