སློབ་གྲྭ་ལྟེ་བ་ཚུ་གིས་ བརྡ་བརྒྱུདཔ་ཚུ་དང་གཅིག་ཁར་ འབྲེལ་བ་འཐབ་མ་ཆོག་པའི་སྐོར་ལས་ ལྟ་ཞིབ་འབད་ནི།

༉ འཕྲལ་ཁམས་ཅིག་ཁར་ འགོ་འདྲེན་འཐབ་མི་ རྫོང་བདག་ཚུ་གི་ ཞལ་འཛོམས་སྐབས་ སློབ་གྲྭ་ལྟེ་བ་ཚུ་གིས་ བརྡ་བརྒྱུདཔ་ཚུ་དང་གཅིག་ཁར་ ད་ལས་ཕར་ ཁ་སླབ་མ་ཆོག་པའི་ བཀའ་རྒྱ་གནང་སྟེ་ཡོད་ཟེར་ སླབ་མི་དེ་ ཤེས་རིག་བློན་པོ་གིས་འབད་བ་ཅིན་ ཤེས་རིག་ལྷན་ཁག་གི་ཁ་ཐུག་ལས་ བཀའ་རྒྱ་ག་ཅི་ཡང་ གནང་སྟེ་མེདཔ་ལས་ ག་དེ་སྦེ་ འབད་ཡོདཔ་ཨིན་ན་ ལྟ་ཞིབ་འབད་དགོ་པས་ཟེར་ ལྷན་རྒྱས་གཞུང་ཚོགས་དང་ བརྡ་བརྒྱུདཔ་ཚུ་གི་ ཟླ་རིམ་ཞལ་འཛོམས་སྐབས་ལུ་ བཤད་ཅི།

གནད་དོན་དེ་ཡང་ གནས་ཚུལ་བཤད་མི་ཅིག་གིས་འབད་བ་ཅིན་ ད་ལས་ཕར་ སློབ་གྲྭ་ལྟེ་བའི་ དབུ་འཛིན་ཚུ་གིས་ གནད་དོན་ག་ཅིའི་ཐད་ལས་འབད་རུང་ བརྡ་བརྒྱུདཔ་ཚུ་དང་གཅིག་ཁར་ འབྲེལ་བ་འཐབ་སྟེ་ ཁ་སླབ་མ་ཆོག་པའི་ བཀའ་རྒྱ་དེ་ རྫོང་བདག་ཚུ་གིས་ བྱིན་ཡོདཔ་སྦེ་ཨིན་པས།
ཨིན་རུང་ ཀུན་གསལ་གྱིས་ གནད་དོན་དེ་ ཤེས་རིག་བློན་པོ་ ནོར་བུ་དབང་ཕྱུག་ལུ་ དྲི་བའི་སྐབས་ བློན་པོ་གིས་བ་ཅིན་ རྒྱལ་ཁབ་ནང་ བརྡ་བརྒྱུད་ཀྱི་ དལ་དབང་ག་དེ་སྦེ་ཡོདཔ་ཨིན་ན་ ག་ར་གིས་ཤེསཔ་མ་ཚད་ ཤེས་རིག་ལྷན་ཁག་གི་ཁ་ཐུག་ལས་ བཀའ་རྒྱ་ག་ཅི་ཡང་ གནང་གནངམ་མེད་ཟེར་ཨིན་པས།
ད་ལྟོའི་བར་ན་འབད་རུང་ རྒྱལ་ཁབ་ནང་ བརྡ་བརྒྱུད་ཀྱི་གནས་སྟངས་དེ་ གནས་ཚུལ་བསྡུ་ལེན་པ་ ག་ཨིན་རུང་ པར་ཆས་དང་སྦྲགས་ཏེ་ ས་གནས་ག་ཏེ་ དྲི་བ་དྲིས་ལན་འབད་རུང་ བཀག་མི་ག་ཡང་མེད་པར་ འབད་ཆོག་ཆོ་སྦེ་ འབད་དེ་ཡོད་ཟེར་ བློན་པོ་གིས་ བཤད་ཅི།
དེ་བཟུམ་སྦེ་ རྫོང་བདག་གི་ཞལ་འཛོམས་ནང་ བརྡ་བརྒྱུདཔ་མ་བཙུགས་མི་དེ་ཡང་ ད་རེས་ཀྱི་ཞལ་འཛོམས་དེ་ ཞལ་འཛོམས་ཐེངས་༢༥ པ་ཨིནམ་ད་ ད་ལྟོ་ཚུན་ཚོད་ཀྱི་བར་ན་འབད་རུང་ བརྡ་བརྒྱུདཔ་ཚུ་ མ་བཙུགས་པར་ ཞལ་འཛོམས་མཇུག་བསྡུ་བའི་ཉིན་མར་ གནད་དོན་ག་ཅི་ར་ གྲོས་བསྡུར་འབད་ཡོདཔ་ཨིན་ན་ གནས་ཚུལ་གསར་བཏོན་བཟུམ་སྦེ་ བྱིནམ་ཨིན་ཟེར་ཨིན་པས།
དེ་སྦེ་འབད་དགོ་མི་དེ་ཡང་ རྫོང་ཁག་ཚུ་གིས་ གནད་དོན་འདྲཝ་མ་འདྲཝ་ལེ་ཤ་ཅིག་ཁར་ གྲོས་བསྡུར་འབད་ནི་ཡོདཔ་ལས་ ག་ར་བརྡ་བརྒྱུད་ཀྱི་གདོང་ཁར་འབད་བའི་སྐབས་ སྟབས་མ་བདེཝ་དང་ རྫོང་བདག་ལ་ལོ་ཅིག་ བརྡ་བརྒྱུད་ཀྱི་གདོང་ཁར་ ཐོན་ཏེ་སླབ་ནི་ལུ་ གཡང་ཟ་དོ་ཡོདཔ་ལས་ དེ་གིས་སྦེ་ བརྡ་བརྒྱུདཔ་ཚུ་ ནང་ན་མ་བཙུགས་མི་དེ་ དེ་ལུ་བརྟེན་ཨིནམ་སྦེ་ ནང་སྲིད་དྲུང་ཆེན་གྱིས་ བཤདཔ་མས་ཟེར་ ཤེས་རིག་བློན་པོ་གིས་ བཤད་ཅི།
དེ་བཟུམ་སྦེ་ ཞབས་ཏོག་བློན་པོ་ རྡོ་རྗེ་ཆོས་སྒྲོན་གྱིས་ བཤད་མི་དང་འཁྲིལཝ་ད་ སློབ་གྲྭ་ལྟེ་བའི་དབུ་འཛིན་ཚུ་ ད་ལས་ཕར་ བརྡ་བརྒྱུད་དང་འབྲེལ་བ་འཐབ་མི་ཆོག་ཟེར་ ཤེས་རིག་ལྷན་ཁག་གིས་ བཀའ་གནང་ཡི་ག་ཟེར་ དྲིས་མི་དེ་ གནད་དོན་ག་ཅི་ལུ་བརྟེན་ཨིན་ན་ ཧ་མི་གོ་བས་ཟེར་ཨིན་པས།
ད་ལྟོ་ཚུན་ཚོད་འབད་རུང་ ལྷན་རྒྱས་གཞུང་ཚོགས་དང་ བརྡ་བརྒྱུདཔ་ཚུ་ ཟླ་རིམ་བཞིན་དུ་ འཕྱད་ནི་གི་ ལས་རིམ་བཟོ་སྟེ་ཡོད་མི་ནང་ སྦ་གསང་མེད་པར་ བརྡ་བརྒྱུདཔ་ཚུ་གིས་ དྲི་བ་བཀོད་མི་དེ་ དྭངས་གསལ་གྱི་ཐོག་ལས་ ལན་ཚུ་རྩ་འགེངས་ཏེ་ རྐྱབ་དོ་ཟེར་ཨིན་པས།
དེ་བཟུམ་སྦེ་ བློན་ཆེན་ཚེ་རིང་སྟོབས་རྒྱས་ཀྱིས་འབད་བ་ཅིན་ གཞུང་གིས་ ད་ལྟོ་ཚུན་ བརྡ་བརྒྱུདཔ་ཚུ་དང་གཅིག་ཁར་ དྭངས་གསལ་གྱི་ཐོག་ལས་ འབད་ཡོདཔ་མ་ཚད་ གནས་ཚུལ་བསྡུ་ལེན་པ་ཚུ་དང་གཅིག་ཁར་ ལགཔ་མཐུད་དེ་ གནས་ཚུལ་བསྡུ་ལེན་པ་ གཞན་ཚུ་གིས་ གཞུང་གི་ཁ་ཐུག་ལས་ རྒྱབ་སྐྱོར་འབད་དེ་ དྲི་དགོཔ་སྦེ་ ད་ལྟོ་ཚུན་ འབད་འབདཝ་མེདཔ་ལས་ ག་ཅི་འབད་རུང་ དྭངས་གསལ་ཨིན་ཟེར་ བཤདཔ་ཨིན་པའི་གནས་ཚུལ།

ཡེ་ཤེས་སྒྲོལ་མ།

About admin

Check Also

དྲིན་ཅན་ཕམ་ལུ་ དྲིན་ལན་འཇལ་དགོ་པའི་རྒྱབ་ཁུངས་དང་ དྲིན་ལན་འཇལ་ནིའི་ཐབས་ལམ།

༉ རང་ཟླ་༩ པའི་ཚེས་༢༢ ལུ་ ལྷ་བབས་དུས་ཆེན་གྱི་ཉིནམ་འདི་ དྲིན་ཅན་ཕ་མའི་ཉིནམ་སྦེ་ བརྩི་སྲུང་ཞུཝ་ཨིན།  དེ་སྦེ་བརྩི་སྲུང་འབད་དགོ་པའི་ དམིགས་ཡུལ་གཙོ་བོ་ར་ དྲིན་ཅན་ཕམ་ལུ་ དྲིན་ལན་འཇལ་དགོཔ་ ཁག་ཆེཝ་ཨིནམ་ ཤེས་ནིའི་དོན་ལུ་ཨིན། ཕམ་ཚུ་ལུ་ དྲིན་ལན་འཇལ་དགོ་པའི་ཁུངས་ …

Leave a Reply

Your email address will not be published. Required fields are marked *