ས་ག་ཟླ་བའི་ དུས་ཆེན་ལྔ་འཛོམས་ཀྱི་ རྒྱབ་ཁུངས་མདོར་བསྡུས།

༉ རང་ཟླ་བཞི་པ་འདི་ སྟོན་པ་རྫོགས་པའི་ སངས་རྒྱས་ཀྱི་ དུས་ཆེན་ལྔ་འཛོམས་འབདཝ་ལས་ ས་ག་ཟླ་བ་ཟེར་ དུས་ཆེན་ཁྱད་པར་ཅིག་སྦེ་ བརྩི་སྲུང་འབདཝ་ཨིན།

དེ་ཡང་ དང་པ་ ལྷུམས་སུ་བཞུགས་པའི་ དུས་ཆེན་དེ་ བདག་ཅག་གི་སྟོན་པ་ སྐུ་ཕྲེང་འདི་གི་ཧེ་མར་ དགའ་ལྡན་ལྷ་ཡུལ་ལུ་ ལྷའི་བུ་དམ་པ་ཏོག་དཀར་པོ་ལུ་ སྐུ་སྐྱེས་བཞེས་ཏེ་ ལྷ་ཚུ་ལུ་ ཆོས་ཀྱི་འཁོར་ལོ་ བསྐོར་བཞུགས་པའི་སྐབས་ ཧེ་མར་ སངས་རྒྱས་མར་མེ་མཛད་ཀྱིས་ ལུང་བསྟན་གནང་མི་དེ་ རྗེས་སུ་དྲན་ཐོག་ལས་ མ་འོངས་སངས་རྒྱས་ འཕགས་པ་བྱམས་པ་མགོན་པོ་ ཁོ་རའི་ སྐུ་ཚབ་སྦེ་ བསྐོས་གནང་ཞིནམ་ལས་ ལྷོ་ཕྱོགས་འཛམ་བུ་གླིང་ལུ་ ཤཱཀྱའི་རིགས་ཀྱི་ ཡབ་རྒྱལ་པོ་ཟས་གཙང་དང་ ཡུམ་སྒྱུ་མ་ལྷ་མཛེས་༢ ཀྱི་སྲས་སྦེ་ སྐྱེ་བ་བཞེས་ནིའི་ ཐུགས་བཞེད་གནང་ཡོདཔ་ཨིན་པས།
དེ་ལས་ གླང་པོ་གཞོན་ནུ་ ཐལ་དཀར་མཆེ་བ་དྲུག་ལྡན་ དངུལ་གྱི་ཁ་དོག་བཟུམ་སྦེ་ དཀརཔོ་དང་ མགུ་ཏོ་མེ་ཤེལ་བཟུམ་སྦེ་དམརཔོ་ ལུས་གསེར་གྱི་ ཁ་དོག་བཟུམ་ཅིག་ལུ་སྤྲུལ་ཏེ་ བྱོན་ཞིནམ་ལས་ ཡུམ་སྒྱུ་མ་ལྷ་མཛེས་ཀྱི་ མཆན་ཁུང་གཡས་པ་ལས་མར་ ལྷུམས་སུའམ་ མངལ་ནང་བཞུགསཔ་ད་ ཡུམ་གྱི་གཉིད་ལམ་ནང་ཡང་ དེ་བཟུམ་མའི་ སྣང་བ་བྱུང་ཡོདཔ་མ་ཚད་ སྐུ་ལུས་ཡང་ བདེ་ཏོག་ཏོ་སྦེ་ གྱུར་ཡོདཔ་ཨིན་པས།
དེ་ཡང་ མདོ་སྡེ་རྒྱ་ཆེར་རོལ་པའི་ ལུགས་ལས་འབད་བ་ཅིན་ སྤྱི་ལོའི་སྔོན་མ་༩༦༢ ས་མོ་ལུག་ལོ་ དཔྱིད་ཟླ་ཐ་ཆུང་ ཧོར་ཟླའམ་ རང་ཟླ་༤ པའི་ཚེས་༡༥ འི་ནུབ་མོར་ ཡུམ་སྒྱུ་མ་ལྷ་མཛེས་ གཡུས་སེར་སྐྱའི་ རྒྱལ་པོའི་ཁབ་ཀྱི་ ཕོ་བྲང་ནང་ གསེར་ཁྲི་གུ་ གཟིམ་བཞུགསཔ་ད་ ཡུམ་གྱི་ལྷུམས་སམ་མངལ་དེ་ ལྟ་ན་སྡུག་པ་ འཁོར་བའི་སྐྱོན་གྱིས་ མ་གོས་པར་ རྒྱལ་སྲས་ཚུ་གིས་ ཉེ་བར་ལོངས་སྤྱོད་པའི་གནས་ གཞལ་མེད་ཁང་ལུ་ བྱིན་གྱིས་བརླབས་ དེ་ལས་ ལྷུམས་ནང་བཞུགས་རིང་ལུ་ཡང་ ལྷ་དང་མི་ བྱེ་བ་ལེ་ཤ་ཅིག་ལུ་ སྐྱེ་གནས་རྣམ་པར་སྦྱོང་བའི་ ཆོས་གནང་བཞུགས་ཡོདཔ་ཨིན་པས།
གཉིས་པ་ སྐུ་བལྟམས་སམ་ འཁྲུངས་པའི་དུས་ཆེན་དེ་ སྟོན་པ་རྫོགས་པའི་སངས་རྒྱས་ སྐུ་འཁྲུངས་རན་པའི་སྐབས་ ཡུམ་སྒྱུ་མ་ལྷ་མཛེས་ གནས་ཕུན་སུམ་ཚོགས་པ་ ལུམྦི་ནིའི་ཚལ་ལུ་བྱོན་ཏེ་ མྱ་ངན་མེད་པའི་ ལྗོན་ཤིང་གི་རྩ་བར་ སྐྱེ་དགུའི་བདག་མོ་ལུ་ སྐུ་བརྟེན་སྦེ་བཞུགསཔ་ད་ ཡུམ་གྱི་ མཆན་ཁུང་གཡས་པ་ལས་ ན་ཟུག་ག་ནི་ཡང་མེད་པར་ སྐུ་འཁྲུངས་ཡོདཔ་ལས་ ལྷའི་དབང་པོ་ བརྒྱ་བྱིན་གྱིས་ བདུད་རྩིའི་ཆུ་གིས་ བྱང་ཆུ་སེམས་དཔའ་ལུ་ སྐུ་ཁྲུས་གསོལ་གནང་པའི་ཤུལ་ལུ་ ལྷ་ཚངས་པ་གིས་ དར་དཀར་གྱི་ ན་བཟའ་ཕུལ་ དེ་ལས་ བར་སྣང་གི་ ལྷ་ཚུ་གིས་ བསྟོད་དབྱངས་ཕུན་སུམ་ཚོགས་པ་ཚུ་ ཞུ་ཡོདཔ་ཨིན་པས།
བྱང་ཆུབ་སེམས་དཔའ་ སྐུ་འཁྲུངསམ་ཅིག་ ཚད་མེད་བཞིའི་ལམ་ལུ་ ངེས་པ་བསྟེན་ནིའི་དོན་ལུ་ ཕྱོགས་༤ ལུ་ གོམ་པ་བདུན་བདུན་སྤོ་སྟེ་ བྱོན་པའི་སྐབས་ མེ་ཏོག་པདྨ་བདུན་རེ་ ཤར་ཡོདཔ་མ་ཚད་ ལུམྦི་ནིའི་ཚལ་ལུ་ མེ་ཏོག་ཚུ་ རང་བཞིན་གྱིས་ ཤར་བ་དང་ སེར་སྐྱའི་གྲོང་ཁྱེར་གྱི་སྦུག་ལུ་ བྱང་ཆུབ་ཀྱི་ ལྗོན་ཤིང་དང་ སྐྱེད་མོས་ཚལ་༥༠༠ དང་ གཏེར་༥༠༠ ལ་སོགས་པ་བྱུང་བའི་ རྟགས་མཚན་སྣ་ཚོགས་ བྱུང་ཡོད་པའི་ཁར་ ཡབ་རྒྱལ་པོའི་དོན་ག་ར་ གྲུབ་མི་ལུ་བརྟེན་ མཚན་ཡང་རྒྱལ་སྲས་དོན་ཀུན་གྲུབ་པ་ཟེར་ གསོལ་ཡོདཔ་ཨིན་པས།
གསུམ་པ་ བདུད་བཏུལ་བའི་ དུས་ཆེན་དེ་ སངས་རྒྱས་ཀྱི་ མཛད་པ་༡༢ ཚུ་ནང་ལས་ ཐོན་དོ་བཟུམ་འབད་བ་ཅིན་ བྱང་ཆུབ་སེམས་དཔའ་ རྒྱལ་སྲས་དོན་ཀུན་གྲུབ་པ་ དགུང་ལོ་༣༥ བཞེས་པའི་ ས་ག་ཟླ་བའི་ཚེས་༡༥ ལུ་ སངས་རྒྱས་རནམ་ལས་ རྡོ་རྗེ་གདན་གྱི་ བྱང་ཆུབ་ལྗོན་ཤིང་གི་རྩ་བར་ སྐུ་རྒྱབ་གཏད་དེ་བཞུགས་ཏེ་ སྲོད་འཁོར་ཕག་གི་ དུས་ཚོད་ལུ་ལྷོདཔ་ད་ བདུད་ག་ར་འཇོམས་པའི་ ཏིང་ངེ་འཛིན་ལུ་ མཉམ་པར་བཞག་ཞིནམ་ལས་ འཇིག་རྟེན་གྱི་ཁམས་ག་ར་ ཏིང་ངེ་འཛིན་གྱི་ འོད་ཟེར་གྱིས་ ཁྱབ་པར་མཛད་གནང་ཡོདཔ་ཨིན་པས།
དེ་བསྒང་ བདུད་ཀྱི་རིགས་ཚུ་ ག་ར་དཀྲོགས་མི་ལུ་བརྟེན་ བདུད་ཀྱི་རྒྱལ་པོ་ གཞན་འཕྲུལ་དབང་བྱེད་ཀྱི་མངའ་བདག་ བདུད་སྡིག་ཏོ་ཅན་ དགའ་རབ་དབང་ཕྱུག་གིས་ སངས་རྒྱས་བཅོམ་ལྡན་འདས་ མངོན་པར་རྫོགས་པར་ སངས་རྒྱས་ནི་ལུ་ བར་ཆད་རྐྱབ་ནིའི་དོན་ལུ་ ཤ་རོགསཔ་བཟུམ་བཟོ་སྟེ་ འོང་ཞིནམ་ལས་ སེར་སྐྱའི་གྲོང་ཁྱེར་དེ་ ལྷས་སྦྱིན་གྱིས་ དབང་ཚར་ཡི་ ཕོ་བྲང་ཚུ་བཅོམ་ བཙུནམོ་ཚུ་ ཁྱིམ་ནང་སྒོ་བསྡམས་བཞག་ ཡབ་ཟས་གཙང་ བཙོན་ནང་བཙུགས་ ཤཱཀྱའི་རིགས་ཚུ་ག་ར་ ཕམ་ཚར་ཡི་ ཁྱོད་ག་ཅི་འབད་དཔ་སྨོ་ཟེར་ཞུཝ་ད་ སངས་རྒྱས་ཀྱིས་ མངོན་པར་སངས་རྒྱས་པའི་ སླད་དུའོ་ཟེར་ སངས་རྒྱས་ནིའི་དོན་ལུ་ཟེར་ གསུངས་ཡོདཔ་ཨིན་པས།
བདུད་ཀྱིས་ སངས་རྒྱས་ནི་དེ་ ཚོགས་ལེ་ཤ་བསགས་དགོཔ་ད་ ཁྱོད་རྒྱལ་པོའི་བུ་ སྐྱིད་ཏོང་ཏོ་སྦེ་ སྡོད་མི་ཅིག་ཨིན་ཟེར་ཞུཝ་ད་ རྒྱལ་སྲས་བྱང་ཆུབ་སེམས་དཔའ་གིས་ ཁྱོད་ཀྱིས་ བརྟན་པ་མེད་པའི་ མཆོད་སྦྱིན་རྐྱངམ་གཅིག་གིས་ འདོད་ཁམས་ཀྱི་ རྒྱལཔོ་ཐོབ་པ་ཅིན་ ང་གིས་ བསྐལ་པ་དཔག་ཏུ་མེད་པར་ ཚོགས་༢ བསགས་ཡོདཔ་ལས་ ག་ཅི་སྦེ་ འཚང་མི་རྒྱའམ་ སངས་མི་རྒྱས་ཟེར་གསུངསམ་ད་ བདུད་དགའ་རབ་དབང་ཕྱུག་ ང་རྒྱལ་བསྐྱེད་དེ་ ང་གིས་ བརྟན་པ་མེད་པའི་ མཆོད་སྦྱིན་བཏང་པའི་སྐབས་ དཔང་མོ་ཁྱོད་འདུག་ ཁྱོད་ཀྱིས་ ཚོགས་༢ བསགསཔ་ད་ དཔང་པོ་ག་ཡོད་ཟེར་ ཞུ་ནུག།
དེ་ལུ་ རྒྱལ་སྲས་བྱང་ཆུབ་སེམས་དཔའ་གིས་ ཕྱག་མཛུབ་ས་ལུ་བཙུགས་ཏེ་ ས་འདི་འགྲོ་བ་ཀུན་གྱི་དཔང་ཡིན་ཏེ། །རྒྱུ་དང་མི་རྒྱུ་སྙོམས་ཤིང་ཉེ་འཁོན་མེད། །འདི་ནི་བདག་གི་དཔང་སྟེ་བདག་རྫུན་མེད། །ས་ཁྱོད་འདི་ལ་བདག་གི་དཔང་བྱོས་ཤིག །ཟེར་ ང་གིས་ ཚོགས་གཉིས་བསགས་པའི་སྐབས་ དཔང་པོ་སའི་ལྷ་མོ་ཡོདཔ་ལས་ ད་རེས་ སའི་ལྷ་མོ་ཁྱོད་ཀྱིས་ དཔང་པོ་འབད་དགོ་ཟེར་གསུངསམ་ལས་ སའི་ལྷ་མོ་གིས་ གཟུགས་ཕྱེད་ཀ་ཅིག་བཏོན་ཏེ་ སའི་ཐལཝ་ཆུང་ཀུ་ཅིག་ ལག་པར་བཟུང་ཞིནམ་ལས་ ང་གིས་ དཀྱིལ་འཁོར་དེ་ འདི་ཙམ་གྱི་ཚད་ལུ་བགྱང་ཚུགས། དེ་འབདཝ་ད་ རྒྱལ་སྲས་བྱང་ཆུབ་སེམས་དཔའ་གིས་ སངས་རྒྱས་ནིའི་དོན་ལུ་ དབུ་དང་ ཡན་ལག་བྱིན་མི་དེ་ གྱངས་ཁ་རྐྱབ་མི་ཚུགས་ ད་སངས་རྒྱས་པའི་དུས་ལུ་ བབས་ཨིན་ཟེར་སླབ་སྟེ་ ཡལ་སོ་ནུག་ཟེར་ ཞུ་ནི་ཨིན།
འཕྲོ་མཐུད་བདུན་ཕྲག་ཤུལ་མ།

བསམ་གྲུབ་ལྗོངས་མཁར་ལས་ སྐལ་བཟང་དབང་ཕྱུག།

About admin

Check Also

དགེ་ལེགས་ཕུག་ལུ་ ཆུ་རུད་བཀག་ཐབས་ཀྱི་ ཆུ་བྱག་དང་ ཆུ་ལམ་ལེགས་བཅོས་འབད་ནི།

ཁྲོམ་སྡེ་གིས་ ལོ་ཕྱེད་ཀྱི་ འཆར་དངུལ་བསྐྱར་ཞིབ་སྐབས་ ཉེན་ཅན་ས་ཁོངས་ཚུ་ནང་ ཆུ་རུད་བཀག་ཐབས་ཀྱི་ གཙོ་རིམ་སྒྲིག་ནི་ཨིན་པས། ༉ གནམ་བྱཱར་གྱི་སྐབས་ ཆུ་རུད་ལས་ ཉེན་སྐྱོབ་འབད་མི་ ཆུ་བྱག་ཚུ་ རམ་ཡར་སོཔ་ལས་ དགེ་ལེགས་ཕུག་ ནམ་མཁའ་གླིང་འདེམས་ཁོངས་ནང་ ཨའི་པོ་ལི་རོང་ཆུའི་ …

Leave a Reply

Your email address will not be published. Required fields are marked *