ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
༉ ལྷུན་རྩེ་རྫོང་ཁག་ནང་ ཕུཊ་བཱོལ་རྩེད་འགྲན་འགོ་དང་པ་ འགོ་འདྲེན་འཐབ་མིའི་ནང་ སྡེ་ཚན་༡༣ གྱིས་ བཅའ་མར་གཏོགས་ཡོདཔ་ད་ དེ་ཡང་ སློབ་གྲྭ་ཁག་དང་ རྫོང་ཁག་བདག་སྐྱོང་ སྒེར་སྡེ་ དེ་ལས་ ལུང་ཕྱོགས་ཡིག་ཚང་ཚུ་ནང་ ལཱ་འབད་མི་ཚུ་ཨིན་པས།
ཕུཊ་བཱོལ་རྩེད་འགྲན་དེ་ཡང་ རྫོང་ཁག་རྩེད་རིགས་ཚོགས་པ་གིས་ རྩེདམོ་གོང་འཕེལ་གཏང་ཐབས་ལུ་དང་ མི་ཚུ་གི་བར་ན་ འབྲེལ་མཐུན་ཡར་དྲག་གཏང་ཐབས་ལུ་ འགོ་འདྲེན་འཐབ་ཡོདཔ་ཨིན་པས།
རྫོང་ཁག་རྩེད་རིགས་ཚོགས་པའི་ དྲུང་ཆེན་ཀརྨ་གིས་ སླབ་མིའི་ནང་ ཞི་གཡོགཔ་དང་ ལུང་ཕྱོགས་ཁག་གི་ལས་བྱེདཔ་ དེ་ལས་ སྒེར་སྡེ་ཚུ་ནང་ ལཱ་འབད་མི་ཚུ་ ཉིན་བསྟར་གྱི་ ལཱ་ལུ་ བརྩོན་སྡོདཔ་མ་གཏོགས་ ད་ལྟོ་ཚུན་ ཕུཊ་བཱོལ་རྩེད་འགྲན་ཚུ་ མེདཔ་ལས་ གཅིག་སྒྲིལ་མཐུན་ལམ་ཚུ་ཡང་ དེ་ཅིག་མིན་འདུག་ཟེར་ཨིན་པས།
རྒྱུ་མཚན་དེ་ལུ་བརྟེན་ དུས་ཅི་ལས་ གནམ་བྱཱར་གྱི་ ཕུཊ་བཱོལ་འགྲན་བསྡུར་འགོ་བཙུགས་མི་དེ་གིས་ རྩེད་རིགས་ཡར་རྒྱས་གཏང་ཚུགསཔ་མ་ཚད་ མི་ཚུ་གི་བར་ན་ མཐུན་ལམ་ཡར་རྒྱས་གཏང་ཚུགས་ནི་དང་ གཟུགས་ཁམས་སྒྲིང་སྒྲི་བཞག་ཚུགས་པའི་ ཁེ་ཕན་ཡོད་ཟེར་ཨིན་པས།
བཅའ་མར་གཏོགས་མི་ དགེ་ལེགས་རྒྱ་མཚོ་གིས་ སླབ་མིའི་ནང་ ཉེ་འདབས་ཀྱི་རྫོང་ཁག་ མོང་སྒར་ལུ་འབད་བ་ཅིན་ ལོ་བསྟར་བཞིན་དུ་ ཕུཊ་བཱོལ་རྩེད་འགྲན་ ཁག་མང་རབས་ཅིག་ འགོ་འདྲེན་འཐབ་དོ་ཡོད་རུང་ ལྷུན་རྩེ་རྫོང་ཁག་ནང་ ཡང་ཅིན་ རྩེད་རིགས་ཚོགས་པ་མེདཔ་ཨིན་ན་ མ་ཤེས་པར་ སྟོང་ཧང་ཧ་སྦེ་ སྡོད་དགོཔ་བྱུང་ཡི་ཟེར་ཨིན་པས།
དེ་བཟུམ་སྦེ་ སློབ་དཔོན་ཅིག་ཨིན་མི་ ཀུན་ལེགས་དབང་ཕྱུག་གིས་ སླབ་མིའི་ནང་ རྫོང་ཁག་གཞན་ཚུ་ནང་འབད་བ་ཅིན་ རྩེད་རིགས་ཁག་མ་འདྲཝ་ཚུ་ འགོ་འདྲེན་འཐབ་ནི་ཡོདཔ་ལས་ མི་ཚུ་གི་བར་ན་ མཐུན་ལམ་བཞག་ཚུགསཔ་མ་ཚད་ མཐུན་ལམ་དེ་ལུ་བརྟེན་ ཡིག་ཚང་གི་ལཱ་འབདཝ་ད་ སྟབས་བདེ་ཧིང་ར་ མི་འདྲ་བས་ཟེར་ཨིནམ་ད་ གཟུགས་ཁམས་ལུ་ཡང་ ཕན་ཐོགས་འདུག་ཟེར་ཨིན་པས།
འགོ་འདྲེན་འཐབ་མི་ཚུ་གིས་ སླབ་མིའི་ནང་ སྡེ་ཚན་རེ་ནང་ རྩེད་འགྲན་འབད་མི་ སློབ་ཕྲུག་༣ ལས་བརྒལ་ བཅའ་མར་གཏོགས་མ་ཆོག་པའི་ ལམ་ལུགས་དང་འཁྲིལ་ རྒེད་འོག་༨ ལས་ སྡེ་ཚན་རེ་དང་ རྫོང་ཁག་བདག་སྐྱོང་ སྒེར་སྡེ་ དེ་ལས་ ཁྲོམ་སྡེ་ལས་སྡེ་ཚན་༡ བསྡོམས་ཀྱིས་སྡེ་ཚན་༡༣ ཐོན་ཏེ་ཡོད་ཟེར་ཨིན་པས།
དེ་བཟུམ་སྦེ་ འགོ་འདྲེན་པ་ ཚེ་རིང་དབང་ཕྱུག་གིས་ སླབ་མིའི་ནང་ སྤྱི་ཟླ་༨ པའི་ཚེས་༡༩ ལས་འགོ་བཙུགས་ སྤྱི་ཟླ་༩ པའི་ཚེས་༣ ཚུན་ སྡེ་ཚན་དབྱེ་ཁག་༤ བཟོ་མི་ཚུ་གི་བར་ན་ རྩེད་འགྲན་འབད་བའི་ཤུལ་ལུ་ སྡེ་ཚན་༢ ཀྱི་བར་ན་ མཐའ་བཅད་རྩེད་འགྲན་འབད་ནི་ཨིན་ཟེར་ཨིན་པས།
རྩེད་འགྲན་དེ་ཡང་ གཟའ་ཉི་མ་དང་ ཟླ་བ་ལུ་ སྡེ་ཚན་༦ གི་བར་ན་ རྩེད་འགྲན་འབད་དོ་ཡོདཔ་ད་ དེ་ཡང་ མཁོ་མ་འབྲིང་རིམ་སློབ་གྲྭ་འོག་མའི་ ཕུཊ་བཱོལ་རྩེད་ཐང་ནང་སྦེ་ རྩེད་འགྲན་འབདཝ་ཨིན་པས།
སྡེ་ཚན་རེ་ལས་ འཛུལ་འཐུས་དངུལ་ཀྲམ་༧,༥༠༠ རེ་བསྡུ་ལེན་འབད་ཡོདཔ་ད་ རྩེད་འགྲན་ནང་ལས་ ཨང་དང་པ་ཐོན་མི་ སྡེ་ཚན་དེ་ལུ་ དངུལ་རྐྱང་གི་གསོལ་རས་ དངུལ་ཀྲམ་༥༠,༠༠༠ དང་ ཨང་༢ པ་ཐོན་མི་ལུ་ དངུལ་རྐྱང་གི་གསོལ་རས་ དངུལ་ཀྲམ་༢༥,༠༠༠ བྱིན་ནི་ཨིན་པས།
སྤྱི་ཟླ་༨ པའི་ཚེས་༡༩ ལུ་ རྫོང་བདག་གི་སྡེ་ཚན་དང་ སྡེ་ཚན་མདེའུ་༢ ཀྱི་བར་ན་ རྩེད་འགྲན་འབད་བའི་སྐབས་ མདེའུ་སྡེ་ཚན་གྱིས་ གཱོལ་༦ བཙུགས་ཏེ་ ཕམ་བཏང་པའི་སྐབས་ རྫོང་བདག་གིས་ གཱོལ་༡ ལས་བརྒལ་ བཙུགས་མ་ཚུགས་པའི་གནས་ཚུལ།
མཁོ་མ་ལས་ བཀྲིས་ཕུན་ཚོགས།
