རྒེད་འོག་བདག་སྐྱོང་འགོ་དཔོན་མེད་པར་ འཆར་གཞིའི་ལས་སྣ་ཚུ་ལུ་ ཐོ་ཕོག་ཡོདཔ།

༉ རྩི་རང་རྫོང་ཁག་ བར་གཤོང་རྒེད་འོག་ནང་ བདག་སྐྱོང་འགོ་དཔོན་མེད་པར་ ལོ་ལང་དོ་ཡོདཔ་ད་ ད་ཚུན་ སོ་ནམ་རྒྱ་སྐྱེད་འགོ་དཔོན་གྱིས་ ལཱ་འབད་ཡོདཔ་ཨིན་པས།
ཧེ་མའི་ བདག་སྐྱོང་འགོ་དཔོན་དེ་ སྤྱི་ལོ་༢༠༡༨ ཟླ་༡ པའི་ནང་ གསར་སྤང་ལུ་ གནས་སོར་སོང་པའི་ཤུལ་ལུ་ ས་སྟོང་ཐོན་ཡོདཔ་ཨིན་པས།
བར་གཤོང་རྒཔོ་ སཱན་ཏ་ལཱལ་པའུ་ཌེལ་གྱིས་ སླབ་མིའི་ནང་ རྒེད་འོག་བདག་སྐྱོང་འགོ་དཔོན་མེད་པའི་བསྒང་ལས་ རྒེད་འོག་གི་ལཱ་ཚུ་ ཚུལ་ལྡན་སྦེ་ འབད་མི་ཚུགས་པའི་ཁར་ བདག་སྐྱོང་འགོ་དཔོན་གྱི་ ལཱ་ཚུ་ཡང་ རྒཔོ་ཁོ་ར་གིས་འབད་ཡི་ཟེར་ཨིན་པས།
རྒཔོ་གིས་འབད་བ་ཅིན་ བདག་སྐྱོང་འགོ་དཔོན་དགོ་པའི་སྐོར་ལས་ ས་གནས་གཞུང་སྐྱོང་ལས་ཁུངས་ལུ་ ཡི་གུ་བཏང་ཡོད་རུང་ ལན་གསལ་ག་ནི་ཡང་ མ་འོང་ཟེར་ཨིནམ་ད་ བདག་སྐྱོང་འགོ་དཔོན་མེད་པའི་ཤུལ་ལུ་ རྒེད་འོག་གོང་འཕེལ་གྱི་ ལས་སྣ་དང་ འཆར་གཞིའི་ལཱ་ཚུ་ལུ་ ཐོ་ཕོག་སྟེ་ཡོད་ཟེར་ཨིན་པས།
རྒྱལ་ཡོངས་དགའ་སྐྱིད་དཔལ་འཛོམས་ལྷན་ཚོགས་ཀྱིས་ འཆར་གཞི་༡༢ པའི་ལས་སྣ་ཚུ་ བསྐྱར་ཞིབ་ཀྱི་དོན་ལས་ རྒེད་འོག་ནང་ བཏང་ཡོད་རུང་ དེ་འཕྲོ་ལས་ ལཱ་འབད་མ་ཚུགསཔ་ལས་ སྤ་ཚར་གླིང་རྒེད་འོག་བདག་སྐྱོང་འགོ་དཔོན་གྱིས་ རྒྱབ་སྐྱོར་འབད་ཡོད་རུང་ ལཱ་ཚུ་ ཞིབ་ཞིབ་འབད་ནི་ལུ་ ལཱ་ཁག་འདུག་ཟེར་ རྒཔོ་གིས་ བཤདཔ་ཨིན་པས།
འགོ་དཔོན་མེད་པར་ ཡུན་རིངམོ་སྦེ་ར་ ལུས་སོང་པ་ཅིན་ འཆར་གཞི་༡༢ པའི་ལས་སྣ་ལུ་ ཐོ་ཕོག་ནི་ཨིན་པའི་ ཚ་གྱང་ཡོད་པའི་ཁར་ རྒེད་འོག་གི་འཆར་གཞི་འཛིན་སྐྱོང་འབད་ནི་དེ་ རྒེད་འོག་གཞན་གྱི་ བདག་སྐྱོང་འགོ་དཔོན་ཚུ་གི་འགན་ཁུར་མེནམ་ལས་ སྤུས་ཚད་ལུ་ཡང་ གནོད་ནི་མས་ཟེར་ རྒཔོ་སཱན་ཏ་ལཱལ་པའུ་ཌེལ་གྱིས་ བཤདཔ་ཨིན་པས།
བདག་སྐྱོང་འགོ་དཔོན་མེད་པའི་སྐོར་ལས་ འདས་པའི་རྫོང་ཁག་ཚོགས་འདུ་ཚུ་ནང་ བཙུགས་ཡོདཔ་ད་ འཕྲལ་ཁམས་ཅིག་ཁར་ འགོ་འདྲེན་འཐབ་མི་ རྫོང་ཁག་ཚོགས་འདུའི་སྐབས་ལུ་ཡང་ ལོག་ཐོན་ཡོདཔ་ཨིན་པས།
གནད་དོན་དེའི་སྐོར་ལས་ འདས་པའི་རྫོང་ཁག་ཚོགས་འདུའི་སྐབས་ ཆ་འཇོག་གྲུབ་ཡོདཔ་ད་ ཚོགས་འདུའི་གྲོས་ཆོད་དང་གཅིག་ཁར་ ས་གནས་གཞུང་སྐྱོང་ལས་ཁུངས་ལུ་ གཏང་འོང་ཟེར་ཨིན་པས།
རྫོང་ཁག་ཚོགས་འདུ་གིས་ རྫོང་ཁག་གི་ སྤྱི་ཚོགས་ཀྱི འཐུས་མི་ཚུ་ལུ་ སྙན་ཞུ་འབད་ནི་ཨིནམ་ལས་ འཕྲལ་མགྱོགས་ར་ རྒེད་འོག་བདག་སྐྱོང་འགོ་དཔོན་ འཐོབ་ནི་གི་ རེ་བ་ཡོད་ཟེར་ རྫོང་ཁག་ཚོགས་འདུའི་ཁྲི་འཛིན་ ཤི་བ་ལཱལ་ཀ་ར་རི་ཡ་གིས་ བཤད་ཡོད་པའི་གནས་ཚུལ།

གནས་བརྟན་རྡོ་རྗེ་དང་ ནིར་མ་ལ་པོག་རེལ།

 

About admin

Check Also

སྐྱེས་ལོ་༡༢ ཡན་ཆད་འབད་མི་ བུམོ་ཅིག་གིས་ ཨ་ལོ་སྐྱེས་ཡོདཔ།

༉ སྐྱེས་ལོ་༡༢ ཡན་ཆད་འབད་མི་ བུམོ་ཅིག་གིས་ ཨ་ལོ་སྐྱེས་ཡོད་མི་དེ་ལུ་ ཐིམ་ཕུག་ཁྲིམས་སྲུང་འགག་པ་གིས་ ཞིབ་དཔྱད་འབད་བའི་ཤུལ་ལས་ རྩོད་དཔོན་ཡོངས་ཁྱབ་ཡིག་ཚང་ལུ་ སྙན་ཞུ་འབད་མི་དེ་ ད་རེས་ནངས་པར་ ཁྲིམས་འདུན་ལུ་ རྩོད་བཤེར་འབད་བའི་བསྒང་ཨིན་པས། དེ་ཡང་ བུམོ་ཅིག་གིས་ སྤྱི་ལོ་༢༠༢༢ …

Leave a Reply

Your email address will not be published. Required fields are marked *