ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
༉ སྤྱི་ལོ་༢༠༡༨ ཀྱི་ རྒྱལ་ཡོངས་ཚོགས་འདུའི་ བཙག་འཐུ་ནང་ སྤུ་ན་ཁ་གླིང་བུ་ཁ་-སྟོད་ཝང་འདེམས་ཁོངས་ལས་ པི་ཨེཆ་ཌི་གི་ཤེས་ཚད་ཡོད་མི་ བསོད་ནམས་དབང་རྒྱལ་དབང་གིས་ འབྲུག་ཕུན་སུམ་ཚོགས་པའི་ འདེམས་ངོ་སྦེ་ ལོག་དོ་འགྲན་འབད་ནི་ཨིན་པས།
སྤྱི་ལོ་༢༠༡༣ གྱི་ བཙག་འཐུ་ནང་ བཅའ་མར་གཏོགས་མི་ བསོད་ནམས་དབང་རྒྱལ་དབང་དེ་ ཚོགས་པ་གིས་ སྤྱི་ཟླ་༧ པའི་ཚེས་༡༤ ལུ་ ངོ་སྤྲོད་འབད་ཡོདཔ་ད་ སྐྱེས་ལོ་༤༨ དེ་ལུ་ ཡུ་ཨེསི་ཨེ་ ཀོར་ནེལ་གཙུག་ལག་སློབ་སྡེ་ལས་ རང་བཞིན་ཐོན་སྐྱེད་སྲིད་བྱུས་དང་ འཛིན་སྐྱོང་ནང་ དགེ་བཤེས་ཀྱི་ ཤེས་ཡོན་ཡོདཔ་ཨིན་པས།
སྟོད་ཝང་རྒེད་འོག་ ཚ་ཆུ་ཕུག་ལས་ཨིན་མི་ འདེམས་ངོ་དེ་ལུ་ རང་བཞིན་ཐོན་སྐྱེད་འཛིན་སྐྱོང་དང་ མི་མང་སྲིད་བྱུས་ དེ་ལས་ ཤེས་རིག་མཁས་མཆོག་ནང་ ཞིབ་འཚོལ་དང་ སློབ་སྟོན་ ལས་རིམ་འཛིན་སྐྱོང་ དེ་ལས་ དམིགས་བསལ་དུ་ གོང་འཕེལ་སོང་མི་ རྒྱལ་ཁབ་ནང་ ལྕོགས་གྲུབ་གོངས་འཕེལ་གཏང་ནི་ལ་སོགས་པ་ནང་ ལོ་༡༧ གྱི་ ཉམས་མྱོང་ཡོདཔ་ཨིན་པས།
ཁོ་གིས་ ཞི་གཡོག་ནང་ ཕྱག་ཞུ་བའི་སྐབས་ རྒྱལ་འཛིན་ཤེས་རིག་ཚོགས་སྡེའི་ མདོ་ཆེན་དང་ རང་བཞིན་ཉམས་སྲུང་སྡེ་ཚན་ནང་ མཉམ་འབྲེལ་མདོ་ཆེན་སྦེ་ ལཱ་འབད་བའི་ཁར་ སྤྱི་ལོ་༢༠༠༣ ལུ་ རྒྱལ་ཁབ་ནང་ སྲུང་སྐྱོབ་དམག་མིའི དགོས་མཁོ་ཐོནམ་ད་ ཁས་བླངས་དམག་མིའི་ སྦྱོང་བརྡར་ཡང་འབད་ནུག།
འབྲུག་ཕུན་སུམ་ཚོགས་པའི་ གནས་ཚུལ་གསར་བཏོན་དང་འཁྲིལཝ་ད་ འདེམས་ངོ་དེ་ལུ་ གཙོ་རིམ་ལེ་ཤ་ཡོད་མིའི་ནང་ལས་ དང་པ་ར་ མི་དང་ རི་དྭགས་སེམས་ཅན་གྱི་ བྲེལ་ཟིང་སེལ་ཐོག་ལས་ མི་ཚུ་གི་ འཚོ་བའི་གནས་སྟངས་ ཡར་དྲག་གཏང་ནི་དེ་ཨིན་ཟེར་ བཀོད་ནུག།
འགོ་ཐོག་བཙག་འཐུ་ནང་ བསོད་ནམས་དབང་རྒྱལ་དབང་གིས་ མི་སེར་དམངས་གཙོ་ཚོགས་པའི་འཐུས་མི་ ཚོགས་དཔོན་འོགམ་ འཆི་མེད་རྡོ་རྗེ་དང་ འབྲུག་ཀུན་མཉམ་ཚོགས་པའི་འདེམས་ངོ་ ཨོ་རྒྱན་བསྟན་འཛིན་ དེ་ལས་ འབྲུག་མཉམ་རུབ་ཚོགས་པའི་འདེམས་ངོ་ ཌོག་ཊར་རྟ་མགྲིན་རྡོ་རྗེའི་བར་ན་ དོ་འགྲན་འབད་ནི་ཨིན་པའི་གནས་ཚུལ།
ཨོ་རྒྱན་རྡོ་རྗེ།
