ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
༉ ལོ་བསྟར་ཤེས་རིག་གི་ གནས་སྡུད་དང་འཁྲིལཝ་ད་ འཕྲོ་མཐུད་ཤེས་ཡོན་སྦྱང་མིའི་གྱངས་ཁ་དེ་ སྤྱི་ལོ་༢༠༡༧ གྱི་ཤུལ་ལས་ བརྒྱ་ཆ་༤༠ དེ་ཅིག་ མར་བབས་སོང་ནུག་ཟེར་ཨིན་པས།
དེ་ཡང་ སྙན་ཞུ་དང་འཁྲིལཝ་ད་ འདས་པའི་ལོ་ངོ་༡༢ ཀྱི་རིང་ ལས་རིམ་འགོ་འདྲེན་འཐབ་མི་དེ་ མཐར་འཁྱོལ་འགྱོ་བའི་རྟགས་ཨིནམ་འོང་ནི་མས་ཟེར་ བཀོད་ནུག།
ཤེས་རིག་ལྷན་ཁག་གིས་ བཀོད་མིའི་ནང་ ལས་རིམ་དེ་ སྤྱི་ལོ་༢༠༠༦ ལས་ ཐིམ་ཕུག་ལུ་ཡོད་མི་ སྐལ་སྐྱིད་སློབ་གྲྭ་ཆེ་བ་ནང་སྦེ་ ཤེས་ཡོན་འཕྲོ་མཐུད་ལྷབ་མ་ཚུགས་མི་ཚུ་ལུ་ མི་ཚེ་གཅིག་ནང་ ཤེས་ཡོན་སྦྱང་ནིའི་ གོ་སྐབས་བཟོ་ཐབས་ལུ་ འགོ་བཙུགས་ཡོད་ཟེར་ཨིན་པས།
ལས་རིམ་དེ་གིས་ སློབ་རིམ་༡༠ པ་དང་༡༢ པ་ནང་ལས་ ཐོན་སྡོད་མི་ཚུ་ལུ་ ལོ་༢ ཀྱི་རིང་ ལྷབ་ནིའི་ གོ་སྐབས་བྱིན་ཡོདཔ་ད་ སྙན་ཞུ་དང་འཁྲིལཝ་ད་ ད་རེས་ ཤེས་ཡོན་སྦྱང་མི་༤༡༤ གིས་ ཐིམ་ཕུག་དང་ཆུ་ཁ་ལུ་ཡོད་མི་ འཕྲོ་མཐུད་སྦྱང་སའི་ལྟེ་བ་ནང་ ཐོ་བཀོད་འབད་དེ་ཡོདཔ་ཨིན་པས།
རྒྱལ་ཁབ་ནང་ ཤེས་ཡོན་འཕྲོ་མཐུད་སྦྱང་ས་༣ ཡོད་ས་ལས་༢ ཐིམ་ཕུག་ལུ་ཡོད་པའི་ཁར་ ཤེས་ཡོན་དེ་ཡང་ ལྷབ་མི་མང་ཤོས་ར་ གཡོག་ནང་ཡོདཔ་ལས་ ཕྱི་རུ་འགོ་འདྲེན་འཐབ་དོ་ཡོདཔ་ཨིན་པས།
ཐིམ་ཕུག་ལུ་ཡོད་མི་ དཔལ་འཁྱིལ་དང་ ཆུ་ཁ་ལུ་ཡོད་མི་ ནོར་བུ་སློབ་སྡེ་གིས་ ནང་རིག་དང་ཚོང་རིག་ནང་ འཕྲོ་མཐུད་ཤེས་ཡོན་སྦྱང་ནིའི་ གོ་སྐབས་སྤྲོད་དོ་ཡོདཔ་ད་ ཐིམ་ཕུག་ལུ་ཡོད་མི་ རྫོང་ཁ་གོང་འཕེལ་སློབ་སྦྱོང་གཙུག་སྡེ་གས་ རིག་གཞུང་གི་ཆོས་ཚན་ཚུ་ནང་ གོ་སྐབས་བྱིན་དོ་ཡོདཔ་ཨིན་པས།
གཞི་རྟེན་ཤེས་ཡོན་ལས་རིམ་དེ་གིས་ ན་ལོན་ཚུ་གི་དོན་ལུ་ གཞི་རྟེན་ཤེས་ཡོན་གྱི་ ཤེས་ཚད་དེ་ ཡོངས་གྲགས་ཅན་ཅིག་ལུ་ གྱུར་ཡོད་པའི་ཁར་ དེ་གིས་ མི་སྡེ་ནང་ དར་ཁྱབ་སོང་ཡོདཔ་ཨིན་པས།
སྤྱི་ལོ་༢༠༡༨ ཀྱི་ཟླཝ་༦ པ་ཚུན་གྱི་ གནས་སྡུད་དང་འཁྲིལཝ་ད་ རྒྱལ་ཁབ་ནང་ གཞི་རྟེན་ཤེས་ཡོན་ལྟེ་བ་༥༦༠ ནང་ ཤེས་ཡོན་སྦྱང་མི་༦༠༡༧ ཡོད་པའི་ཁར་ ལས་རིམ་དེ་ནང་ སློབ་སྟོན་པ་དང་ བཅའ་མར་གཏོགས་མི་གཉིས་ཆ་རའི་ནང་ ཕོ་སྐྱེས་དང་ཕྱདཔ་ད་ ཨམ་སྲུ་མང་སུ་ཡོདཔ་ཨིན་པས།
སྙན་ཞུ་དང་འཁྲིལཝ་ད་ སློབ་སྟོན་པ་༥༤༤ ཡོད་ས་ལས་༣༩༢ ཨམ་སྲུ་ཡོད་པའི་ཁར་ ཤེས་ཡོན་སྦྱང་མི་༦༠༡༧ ལས་༤༢༢༩ ཨམ་སྲུ་ཡོདཔ་ད་ རྫོང་ཁག་ཚུ་གི་གྲས་ལས་ བསམ་རྩེ་རྫོང་ཁག་ནང་༦༠༢ ཀྱིས་ ཤེས་ཡོན་སྦྱང་མི་དེ་ མཐོ་ཤོས་ཨིནམ་ད་ དེ་གི་ཤུལ་ལས་ གསར་སྤང་ལུ་༥༧༧ དང་ མོང་སྒར་རྫོང་ཁག་ནང་༥༤༠ ཡོདཔ་ཨིན་པའི་གནས་ཚུལ།
