ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
༉ རྒྱལ་ཡོངས་ཚོགས་སྡེའི་འདེམས་ངོ་ཚུ་གིས་ སྐུལ་བསྒྲགས་འབད་བའི་སྐབས་ ལག་ལེན་འཐབ་ནིའི་ཅ་ཆས་ཚུ་ བཙག་འཐུ་ལྷན་ཚོགས་ཀྱིས་ དུས་ཚོད་ཁར་ གཏང་ནི་མེད་པའི་སྐོར་ལས་ ཉོགས་བཤད་བཀོད་དོ་ཡོད་རུང་ ལྷན་ཚོགས་ཀྱིས་ ཅ་ཆས་ཚུ་ག་ར་ རྫོང་ཁག་ག་ར་ནང་ བཏང་ཡོདཔ་ཨིན་པས།
ལྷན་ཚོགས་ཀྱི་མགྲིན་ཚབ་ བསོད་ནམས་སྟོབས་རྒྱས་ཀྱིས་ བཤད་མིའི་ནང་ ཅ་ཆས་དེ་ཚུ་ དུས་ཚོད་ཁར་ གཏང་མ་ཚུགས་མི་དེ་ཡང་ འདེམས་ངོ་ག་རའི་སྐོར་ལས་ པར་དུས་ཚོད་ཁར་ བཏང་མ་ཚུགས་མི་དེ་གིས་ཡང་ ལྷན་ཚོགས་ཀྱིས་ དུས་ཚོད་ཁར་ པར་སྐྲུན་འབད་མ་ཚུགས་རུང་ ཁ་ཙ་ལས་ ག་ར་བཏང་ཚར་ཡི་ཟེར་ཨིན་པས།
འདེམས་ངོ་ཚུ་གིས་ སླབ་མིའི་ནང་ ལྷན་ཚོགས་ཀྱིས་ སྐུལ་བསྒྲགས་སྐབས་ ལག་ལེན་འཐབ་ནིའི་ ཅ་ཆས་ཚུ་མེད་མི་དེ་གིས་ སྐུལ་བསྒྲགས་ལེགས་ཤོམ་སྦེ་ འབད་མི་ཚུགས་པས་ཟེར་ བཤད་པའི་ཁར་ ལྷན་ཚོགས་ཀྱི་འགོ་དཔོན་ཚུ་གིས་ སླབ་དོ་བཟུམ་འབད་བ་ཅིན་ ལྷན་ཚོགས་ཀྱིས་ བརྡ་བྱང་དང་ ཤོག་བྱང་བསྡོམས་༢༠༠,༠༠༠ དེ་ཅིག་ པར་སྐྲུན་འབད་དེ་ བཏང་ཡི་ཟེར་ཨིན་པས།
འདེམས་ངོ་ལ་ལོ་ཅིག་གིས་ སླབ་མིའི་ནང་ སྐུལ་བསྒྲགས་འབད་བའི་སྐབས་ མི་མང་ལུ་སྤྲོད་ནི་དང་ སྟོན་ནིའི་རིགས་ཚུ་ ག་ནི་ཡང་མེད་པ་ཅིན་ སྐུལ་བསྒྲགས་འབད་རུང་ དོན་དག་ཅིག་ མ་མཐོང་ཟེར་ཨིན་པས།
མོང་སྒར་རྫོང་ཁག་གི་ འདེམས་ངོ་ཅིག་གིས་ སླབ་མིའི་ནང་ ཅ་ཆས་མཐུན་རྐྱེན་དེ་ཚུ་ ཕྱིས་སོ་ནི་དེ་གིས་ རྒེད་འོག་ཚུ་ནང་ལས་ཕར་ སྐུལ་བསྒྲགས་འབད་མ་ཚུགས་པའི་ ཚ་གྱང་ཡོད་ཟེར་ཨིན་པས།
དབང་འདུས་རྫོང་ཁག་གི་ ངོས་ལེན་འགོ་དཔོན་ ཚེ་རིང་དཔལ་འབྱོར་གྱིས་ སླབ་མིའི་ནང་ སྐུལ་བསྒྲགས་ཀྱི་ཅ་ཆས་ཚུ་ ཕྱིས་སོ་ཏེ་འབད་རུང་ ཁོ་གིས་ འདེམས་ངོ་ཚུ་ལུ་ ལྷན་ཚོགས་དང་གཅིག་ཁར་ དཀའ་ངལ་ཡོད་པའི་སྐོར་ལས་ བཤད་བྱིན་ཡི་ཟེར་ཨིནམ་ད་ འདེམས་ངོ་ལ་ལོ་གིས་ པར་སྐྲུན་འབད་ནིའི་དོན་ལུ་ ཕྱིས་སུ་སྦེ་ སྤྲོད་ནུག་ཟེར་ཨིན་པས།
རྩི་རང་གི་ ངོས་ལེན་འགོ་དཔོན་ རྡོ་རྗེ་རིན་ཆེན་གྱིས་ སླབ་མིའི་ནང་ ད་རིས་ལས་ སྤྱིར་བཏང་འཛོམས་འདུ་ འགོ་བཙུགས་ནི་ཨིན་རུང་ སྐུལ་བསྒྲགས་ཀྱི་ཅ་ལ་ཚུ་ཡང་ ད་རིས་རྐྱངམ་གཅིག་ ལྷོད་ཚུགས་པའི་རེ་བ་ཡོདཔ་ལས་ འདེམས་ངོ་ཚུ་གིས་ སྐུལ་བསྒྲགས་འབད་བའི་སྐབས་ ལག་ལེན་འཐབ་ཚུགས་ཟེར་ཨིན་པས།
ཀྲོང་གསར་གྱི་ ངོས་ལེན་འགོ་དཔོན་ ཀུན་བཟང་སྟོབས་རྒྱས་ཀྱིས་ སླབ་མིའི་ནང་ རྫོང་ཁག་གི་ སྤྱིར་བཏང་འཛོམས་འདུ་དེ་ སྤྱི་ཟླ་འདི་གི་ཚེས་༢༩ ལས་ འགོ་བཙུགས་ནི་ཨིནམ་ལས་ འདེམས་ངོ་ཚུ་ལས་ ཉོགས་བཤད་མིན་འདུག་ཟེར་ཨིན་པས།
བཀྲིས་གཡང་རྩེ་རྫོང་ཁག་བཟུམ་ཅིག་ནང་འབད་བ་ཅིན་ འདེམས་ངོ་ལ་ལོ་གིས་ སྒོ་བཤལ་སྐུལ་བསྒྲགས་འབད་ནི་ འགོ་བཙུགས་ཡོད་རུང་ ཅ་ཆས་ཚུ་ དུས་ཚོད་ཁར་ ལྷོད་ཚུགས་པའི་ རེ་བ་བསྐྱེད་དོ་ཡོདཔ་ཨིན་པས།
དར་དཀར་ནང་གི་དོན་ལུ་ཨིན་པ་ཅིན་ ངོས་ལེན་འགོ་དཔོན་གྱིས་ ཁོ་ར་ ཐིམ་ཕུག་ལུ་འོང་བའི་ཞོར་ཁར་ བརྡ་བྱང་ཚུ་ འབག་འགྱོ་ཡོད་རུང་ གཞན་ཅ་ཆས་ཚུ་ མགྱོགས་པར་ལྷོད་པའི་ རེ་བ་ཡོདཟེར་ སླབ་ཨིན་པས།
མོང་སྒར་རྫོང་ཁག་ནང་ རྒེད་འོག་༡༡ ཡོདཔ་ལས་ རྫོང་ཁག་གི་དོན་ལུ་ སྤྱིར་བཏང་འཛོམས་འདུ་དེ་ ཉིནམ་༢ ཀྱི་ཧེ་མ་ལས་ འགོ་བཙུགས་ཡོདཔ་ཨིན་པས།
བསོད་ནམས་སྟོབས་རྒྱས་ཀྱིས་ སླབ་མིའི་ནང་ མཐུན་རྐྱེན་ཚུ་ དུས་ཚོད་ཁར་ བཏང་མ་ཚུགས་པའི་ གནད་དོན་ཅིག་དེ་ཡང་ འདེམས་ངོ་ཚུ་གི་པར་དང་སྦྲགས་ཡོད་མི་ཚུ་ ལོག་སྟེ་ བཟོ་བཀོད་འབད་དགོ་ནི་དེ་གིས་ ཕྱིས་ཡོད་རུང་ དེ་གིས་ སྒྲིག་གཞི་ག་ཅི་ནང་ཡང་ འགལ་བ་མེད་ཟེར་ ཨིན་པའི་གནས་ཚུལ།
བཀྲིས་བསྟན་འཛིན།
