ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
༉ མི་དབང་མངའ་བདག་རིན་པོ་ཆེ་མཆོག་ དགུང་ལོ་༣༨ བཞེས་པའི་ སྐུའི་འཁྲུངས་སྐར་དུས་སྟོན་ བརྩི་སྲུང་དང་འབྲེལ་ ཁ་ཙ་དྲོ་པར་ མི་དབང་རྒྱལ་བཙུན་རྣམ་གཉིས་དང་ མི་དབང་རྒྱལ་སྲས་མཆོག་ སྤ་རོ་སྟག་ཚང་ལུ་ ཆིབས་སྐྱོད་གནང་སྟེ་ ཐུགས་སྨོན་གནང་ཡོདཔ་ཨིན་པས།
རྒྱལ་ཁབ་ནང་ ནང་པའི་གནས་རྩ་ཆེ་ཤོས་ཅིག་ཨིནམ་སྦེ་ ཆ་བཞག་མི་ སྟག་ཚང་ལྷ་ཁང་དེ་ དུས་རབས་ལེ་ཤ་ཅིག་གི་རིང་ལུ་ ནང་པའི་བླ་ཆེན་དམ་པ་ཚུ་གིས་ བཞེངས་གནང་ཡོདཔ་བཞིན་དུ་ ལྷ་ཁང་བཞེངས་སའི་ བྱ་ཕུག་བྱིན་ཅན་དེ་ནང་ དུས་རབས་༨ པའི་ནང་ ཨྱོན་གུ་རུ་རིན་པོ་ཆེ་མཆོག་ སྒོམ་སྒྲུབ་གནང་སྟེ་ བཞུགས་ཡོདཔ་ལས་ སྦས་གནས་བྱིན་བརླབས་ཅིག་ཨིན་པས།
ད་རེས་ མི་དབང་རྒྱལ་སྲས་མཆོག་ སྟག་ཚང་ལུ་ བྱོན་མི་དེ་ འགོ་དང་པ་ཨིན་པས།
ཁ་ཙ་ཕྱི་རུ་ཁམས་ཅིག་ཁར་ མི་དབང་མཆོག་གིས་ སྤ་རོ་ཤར་པ་ལུ་ འབྲུག་གི་བསྟན་སྲུང་དམག་སྡེའི་ ཀ་མཱན་ཌོ་བྱང་སེང་ནང་ འཛམ་གླིང་སྤྱི་ཚོགས་ཀྱི་ ཞི་བདེ་སྲུང་སྐྱོབ་དམག་མིའི་ནང་ གྲལ་གཏོགས་འབད་ནི་ཨིན་མི་ འབྲུག་གི་སྡེ་ཁག་དང་པའི་གྲངས་སུ་ཚུད་མི་ དམག་མི་དང་ འགོ་དཔོན་ཚུ་དང་གཅིག་ཁར་ དམིགས་བསལ་གྱི་ཉིནམ་སྦེ་ བརྩི་སྲུང་གནང་ནུག།
འབྲུག་གི་དམག་སྡེ་དེ་ འཛམ་གླིང་སྤྱི་ཚོགས་ལས་ ཞི་བདེ་སྲུང་སྐྱོབ་དམག་མིའི་ནང་ གཏང་དགོ་པའི་ བརྡ་བསྐུལ་ཐོབ་སྟེ་ ཉིན་གྲངས་༦༠ གི་ནང་འཁོད་ལུ་ ཞི་བདེ་སྲུང་སྐྱོབ་ས་ཁོངས་ནང་ གཏང་ནི་ལུ་ གྲ་སྒྲིག་སོང་སྟེ་ཡོདཔ་ཨིན་པས།
འབྲུག་གིས་ སྤྱི་ལོ་༢༠༡༤ ལས་ཚུར་ འཛམ་གླིང་སྤྱི་ཚོགས་ཀྱི་ ཞི་བདེ་སྲུང་སྐྱོབ་ལག་ལེན་ནང་ བཅའ་མར་གཏོགས་ནི་ འགོ་བཙུགས་ཡོདཔ་བཞིན་དུ་ ད་ཚུན་གྱི་བར་ན་ འབྲུག་གི་ ཞི་བདེ་སྲུང་སྐྱོབ་དམག་མི་༨༢ ལྷགཔ་ཅིག་གིས་ འཛམ་གླིང་རྒྱལ་ཁབ་སོ་སོའི་ནང་ཡོད་མི་ འཛམ་གླིང་སྤྱི་ཚོགས་ཀྱི་ ས་གོ་ཚུ་ནང་ མཐར་འཁྱོལ་ཅན་སྦེ་ ཕྱག་ཞུ་ཡོདཔ་ཨིན་པས།
སྤ་རོ་རྫོང་ཁག་གི་ དམག་མི་བགྲེསཔ་དང་ བདེ་སྲུངཔ་ཚུ་གིས་ཡང་ ཁྱད་པར་ཅན་གྱི་ དུས་སྟོན་བརྩི་སྲུང་ནང་ གྲལ་གཏོགས་འབད་ཡོད་པའི་གནས་ཚུལ།
