ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
༉ ཤར་ནུབ་གཞུང་ལམ་བདའ་སྟེ་ རྒྱུན་འགྲུལ་འཐབ་མི་ཚུ་ལུ་ ཀྲོང་གསར་མཐོ་མང་བྲག་ནང་ བྱག་གཟར་དྲགས་དང་ ལམ་ཆུང་ཀུ་ཡོད་མི་ལུ་བརྟེན་ གདོང་ལེན་བྱུང་ཡོད་རུང་ ས་ཁོངས་དེ་ནང་ ས་དོང་ནང་ལས་ ལམ་བཏོན་ནི་གི་ འཆར་གཞི་ཡོདཔ་ལས་ དཀའ་ངལ་བསལ་ཚུགས་པའི་ རེ་བ་ཡོདཔ་ཨིན་པས།
ད་རེས་ནངས་པར་ ཀྲོང་གསར་ལུང་ཕྱོགས་ལམ་སེལ་ལས་ཁུངས་ཀྱི་ ས་ཁོངས་ནང་ཚུད་མི་ ཤར་ནུབ་གཞུང་ལམ་ རྒྱ་སྐྱེད་ཀྱི་ ལཱ་ མང་ཤོས་ར་ འབད་ཚར་ཏེ་ རྩི་ནག་བཏང་ཡོད་རུང་ མཐོ་མང་བྲག་ས་ནང་རྐྱངམ་གཅིག་ སྒོ་དོག་དྲགས་དང་ བྱག་གཟར་དྲགས་སྦེ་ ཡོད་ནི་དེ་གིས་ ལམ་རྒྱ་སྐྱེད་ཀྱི་ ལཱ་མ་འབད་བར་ བཞག་སྟེ་འདུག།
ལམ་སེལ་ལས་ཁུངས་ཀྱི་ བཟོ་རིག་གཙོ་འཛིན་ ཨོ་རྒྱན་རྡོ་རྗེ་གིས་ མཐོ་མང་བྲག་གི་ ས་ཁོངས་ནང་ མི་ཊར་༨༢༠ དེ་ཅིག་ ས་བཅད་དགོཔ་ཡོད་རུང་ བྱག་གཟར་དྲགས་དང་ རྡོ་དེ་ཚུ་ཡོད་ནི་དེ་གིས་ ལཱ་འཕྲོ་མཐུད་འབད་མ་ཚུགས་པར་ བཤོལ་བཞག་སྟེ་ཡོད་རུང་ འཆར་གཞི་༡༢ པའི་ནང་ ས་འོག་ལམ་ བཏོན་ནི་སྦེ་ གྲོས་འཆར་བཙུགས་ཏེ་ཡོད་ཟེར་ བཤད་ཅི།
ཁོ་གིས་འབད་བ་ཅིན་ ས་འོག་ལམ་ བསེལ་བ་ཅིན་ ལམ་མི་ཊར་༣༠༠ དེ་ཅིག་ ཐུང་ཀུ་འགྱོ་འོང་ཟེར་ཨིནམ་ད་ ད་ལྟོ་ ས་བཅད་ཀྱི་ ལཱ་འབད་བ་ཅིན་ ཤུལ་ལས་ ས་འོག་ལམ་ བསལ་བའི་སྐབས་ ཟད་འགྲོ་དང་ མཐུན་རྐྱེན་ཚུ་ འཕྲོ་བརླག་འགྱོ་ནི་ཨིནམ་ལས་ ས་བཅད་ཀྱི་ལཱ་ མ་འབད་བར་ བཞག་ཅི་ཟེར་ བཤདཔ་ཨིན་པས།
ཨོ་རྒྱན་རྡོ་རྗེ་གིས་འབད་བ་ཅིན་ ས་འོག་ལམ་དེ་ཡང་ ཇ་པཱན་རྒྱལ་སྤྱི་མཉམ་འབྲེལ་ལས་སྡེ་ ཇའི་ཀ་གིས་ བཏོན་ནི་ཨིནམ་བཞིན་དུ་ དེ་གི་དོན་ལུ་ སྔོན་འགྲོའི་གཞི་རྟེན་ བརྟག་ཞིབ་ཚུ་ མཇུག་བསྡུ་སྟེ་ཡོད་ཟེར་ཨིན་པས།
ཁོ་གིས་ སླབ་མིའི་ནང་ ཇའི་ཀ་ལས་སྡེའི་ མདོ་ཆེན་ཡང་ ས་ཁོངས་ནང་ བལྟ་སྐོར་འབད་བར་ འོང་ཐོག་ལས་ ས་དོང་ནང་ལས་ ལམ་བཏོན་ནིའི་ འོས་འབབ་ཡོད་པའི་སྐོར་ སླབ་དེས་ཟེར་ཨིནམ་ད་ ས་འོག་ལམ་ བསལ་ནི་སྦེ་ གྲོས་ཐག་བཅད་དེ་ཡོད་རུང་ ད་ལྟོ་ ཇའི་ཀ་ཡིག་ཚང་ལས་ ཡི་གུ་ག་ནི་ཡང་ མ་ལྷོད་ཟེར་ བཤདཔ་ཨིན་པས།
མ་གཞི་ མཐོ་མང་བྲག་དེ་ཡང་ གཞུང་ལམ་རྒྱ་སྐྱེད་ཀྱི་ལཱ་དེ་ ཁག་འབག་ལུ་ བྱིན་ཡོད་རུང་ དུས་ཡུན་མངམ་འགོར་ནི་དང་ ས་འོག་ལམ་ བསལ་བ་ཅིན་ མགྱོགས་ནི་བཟུམ་ཡོདཔ་ལས་ ལས་ཁུངས་ཀྱིས་ བརྟག་ཞིབ་འབད་ཡི་ཟེར་ཨིན་པས།
ཇའི་ཀའི་ ངོ་ཚབ་གཙོ་འཛིན་ ཀོ་ཇི་ཡ་མ་ཌ་གིས་ སླབ་མིའི་ནང་ ལས་སེལ་ལས་ཁུངས་ཀྱིས་ ཞུ་བ་འབད་ཡོདཔ་བཞིན་དུ་ མཐོ་མང་བྲག་ནང་ ས་དོང་ལམ་བཏོན་ནིའི་དོན་ལུ་ གཞི་རྟེན་གྱི་ལཱ་ཚུ་ སྤྱི་ལོ་༢༠༡༦ ཟླ་༡༠ པ་ལས་ འགོ་བཙུགས་ཅི་ཟེར་ཨིན་པས།
གཞི་རྟེན་གྱི་ ལཱ་མཇུག་བསྡུ་བའི་ ཐག་བཅད་གྲུབ་འབྲས་སྙན་ཞུ་ཚུ་ སྤྱི་ལོ་༢༠༡༧ ཟླ་༢ པའི་ནང་ ལས་ཁུངས་ལུ་ རྩིས་སྤྲོད་ཡོདཔ་མ་ཚད་ ས་དོང་ལམ་ བཏོན་ནིའི་དོན་ལུ་ དུས་ཅི་ རྒྱལ་ཡོངས་དགའ་སྐྱིད་དཔལ་འཛོམས་ལྷན་ཚོགས་ཀྱིས་ ཇ་པཱན་གཞུང་ལུ་ ཞུ་བ་འབད་ཡོདཔ་ལས་ ད་ལྟོ་ གྲོས་འཆར་དེ་ བྱ་རིམ་ནང་ཡོད་ཟེར་ ཀོ་ཇི་ཡ་མ་ཌ་གིས་ བཤདཔ་ཨིན་པས།
རྒྱུན་འགྲུལ་འཐབ་མི་ཚུ་གིས་ སླབ་དོ་བཟུམ་འབད་བ་ཅིན་ གནམ་བྱཱར་སྐབས་ མཐོ་མང་བྲག་ལས་ འགྲོ་འགྲུལ་འབད་ནི་ལུ་ དཀའ་ངལ་བྱུང་མི་དེ་ཡང་ ལམ་རྒྱ་ཆུང་ཀུ་དང་ བྱག་གཟར་དྲགས་ཡོདཔ་ལས་ ལམ་ལྟག་ལས་མར་ རྡོ་འབུད་འོང་ནི་གི་ ཉེན་ཁ་འདུག་ཟེར་ཨིན་པས།
མཐོ་མང་བྲག་དེ་ ཀྲོང་གསར་ལས་ དབང་འདུས་ཕོ་བྲག་ཁ་ཐུག་ལུ་ ཀི་ལོ་མི་ཊར་༢༠ དེ་ཅིག་གི་ ས་གནས་ཁར་ཡོད་པའི་གནས་ཚུལ།
ཀྲོང་གསར་ལས་ ཨོ་རྒྱན་རྡོ་རྗེ།
