ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
༉ བསམ་གྲུབ་ལྗོངས་མཁར་རྫོང་ཁག་གི་ འགོ་དཔོན་ཚུ་གིས་ སླབ་མི་དང་འཁྲིལཝ་ད་ རྫོང་ཁག་ནང་ ཨོམ་གི་ཐད་ཁར་ རང་མགོ་རང་འདྲོངས་ལས་ལྷགཔ་སྦེ་ ཐོན་སྐྱེད་འབད་དེ་ཡོད་ཟེར་ཨིན་པས།
དེ་ཡང་ རྫོང་ཁག་ནང་ རྒེད་འོག་༡༡ ཡོད་ས་ལས་ སྒོ་ནོར་གསོ་སྐྱོང་འཐབ་མི་ མི་སེར་སོ་ནམ་པའི་སྡེ་ཚན་༡༦ གྱིས་ ཉིན་བསྟར་བཞིན་དུ་ ཨོམ་འབོར་ཆེ་ཏོག་ཏོ་སྦེ་ ཐོན་སྐྱེད་འབད་མི་ལུ་བརྟེན་ རྫོང་ཁག་ནང་ མཁོ་འདོད་བཀོད་མི་མེདཔ་བཞིན་དུ་ ས་མཚམས་ཉེ་འདབས་ཀྱི་ རྒྱ་གར་ཨ་སམ་མངའ་སྡེའི་ཁྲོམ་ནང་ ཕྱིར་བཙོང་འཐབ་དོ་ཡོདཔ་ཨིན་པས།
དེ་ཡང་ རྫོང་ཁག་ནང་ རྒེད་འོག་༨ ཡོད་མི་ལས་ ཚོགས་པ་༡༦ གི་འོག་ལུ་ མི་སེར་ཁྱིམ་གུང་པ་༧༣༢ དེ་ཅིག་གིས་ སྒོ་ནོར་གསོ་སྐྱོང་འཐབ་དོ་ཡོདཔ་བཞིན་དུ་ ཉིན་བསྟར་བཞིན་དུ་ ཨོམ་ལི་ཊར་བསྡོམས་༣,༠༠༠ ལྷགཔ་ཅིག་ ཐོན་སྐྱེད་འབད་དོ་ཡོདཔ་ཨིན་པས།
རྒེད་འོག་ཚུ་གི་གྲས་ལས་ ཚོགས་པ་༧ ཡོད་པའི་ ཨོ་རོང་རྒེད་འོག་གིས་ མཐོ་ཤོས་ཨོམ་ལི་ཊར་༡,༠༠༠ དེ་ཅིག་དང་ དེ་གི་ཤུལ་ལས་ ཚོགས་པ་༣ ཡོད་མི་ བདེ་བ་ཐང་རྒེད་འོག་གིས་ ཨོམ་ལི་ཊར་༨༠༠ དེ་གི་ཤུལ་ལས་ ཚོགས་པ་༡ ལས་བརྒལ་མེད་མི་ སྒོམ་དར་རྒེད་འོག་གིས་ ཨོམ་ལི་ཊར་༧༠༠ དེ་ཅིག་ ཐོན་སྐྱེད་འབད་དོ་ཡོདཔ་ཨིན་པས།
རྒེད་འོག་གཞན་ མར་ཚ་ལ་དང་ལང་ཆེན་ཕུག་ ཕུན་ཚོགས་ཐང་དང་པདྨ་ཐང་ དེ་ལས་ ཝང་ཕུག་རྒེད་འོག་ཚུ་གིས་ ཉིནམ་རེ་ལུ་ ཨོམ་ལི་ཊར་༡༠༠ དང་༢༠༠ གི་བར་ན་ ཐོན་སྐྱེད་འབད་དོ་ཡོདཔ་ཨིན་པས།
ནང་འཁོད་ཀྱི་ཚོང་ལམ་ ལེགས་ཤོམ་མེད་མི་ལུ་བརྟེན་ ཨོམ་ཚུ་ ས་མཚམས་ཁྲོམ་ཁར་ ཚོང་འབྲེལ་འཐབ་དོ་ཡོདཔ་བཞིན་དུ་ ཨོ་རོང་དང་ བདེ་བ་ཐང་ སྒོམ་དར་ དེ་ལས་ ཝང་ཕུག་རྒེད་འོག་ཚུ་གིས་འབད་བ་ཅིན་ བསམ་གྲུབ་ལྗོངས་མཁར་གྱི་ ས་མཚམས་ཁྲོམ་སྡེ་ ཡོངས་གྲགས་ལུ་ མེ་ལ་བ་ཛར་ཟེར་སར་ བཙོང་དོ་ཡོདཔ་ད་ རྒེད་འོག་གཞན་ཚུ་གིས་ བསམ་གྲུབ་ཆོས་གླིང་དྲུང་ཁག་ བསམ་རང་གི་ ཉེ་འདབས་ལུ་ཡོད་པའི་ ས་མཚམས་ཁྲོམ་སྡེ་ དི་མ་ཀོ་ཤི་ཟེར་སར་ བཙོང་དོ་ཡོདཔ་ཨིན་པས།
མ་གཞི་ ཨོམ་སྡེ་ཚན་ཚུ་གིས་ ཉིནམ་ཨ་རྟག་ར་ ས་མཚམས་ཁྲོམ་སྡེ་ཚུ་ནང་སོང་སྟེ་ འཕྲལ་འཕྲལ་ ཁྲོམ་བཤལ་རྐྱབ་ཐོག་ལས་དང་ ངོ་ཤེས་མི་ཚུ་གི་ ཟ་ཁང་ཚུ་ནང་འབག་སྟེ་ བཙོང་དོ་ཡོད་རུང་ སྐབས་སྐབས་ ཡོངས་རྫོགས་བཙོང་མ་ཚུགས་པའི་ དཀའ་ངལ་དང་ རྒྱུན་ཆད་མེད་པར་ཐོན་མི་ ཨ་སམ་གྱི་བྲེལ་ཟིང་ལུ་བརྟེན་ ས་མཚམས་སྒོ་ར་ བསྡམས་བཞག་པའི་སྐབས་ལུ་དང་ གློག་མེ་མེད་པའི་སྐབས་ བསགས་བཞག་མ་ཚུགས་པའི་ དཀའ་ངལ་ཐོན་དོ་ཡོདཔ་ཨིན་པས།
དེ་འབདཝ་ལས་ དཀའ་ངལ་དེ་ སེལ་ཐབས་ཀྱི་དོན་ལུ་ རྫོང་ཁག་སྒོ་ནོར་ལས་ཚན་གྱིས་ བདེ་བ་ཐང་ལུ་སྦེ་ ཨོམ་བཟོ་སྦྱོར་འཕྲུལ་ཁང་ཅིག་ གཞི་བཙུགས་འབད་ནིའི་ འཆར་གཞི་ཡོདཔ་ཨིན་པས།
རྫོང་ཁག་སྒོ་ནོར་འགོ་དཔོན་ཚུ་གིས་ སླབ་མིའི་ནང་ ཨོམ་བཟོ་སྦྱོར་འཕྲུལ་ཁང་གི་དོན་ལུ་ ཅ་ཆས་ཚུ་ ཧ་ལམ་གྲ་སྒྲིག་སོང་ཡོདཔ་ལས་ མགྱོགས་པ་ར་ ཁག་འབགཔ་ལུ་ མཁོ་སྤྲོད་འབད་ནི་ཨིན་ཟེར་ཨིན་པས།
ཐོག་གཅིག་འབད་མི་ རྩི་སའི་ཁྱིམ་དང་ ཨོམ་བཟོ་སྦྱོར་འཕྲུལ་ཆས་ཚུ་བརྩིསཝ་ད་ དངུལ་ཀྲམ་ས་ཡ་༣༠ དེ་ཅིག་གནས་ནི་ཨིན་པས།
ཨི་ཕཌ་གི་ མ་དངུལ་རྒྱབ་སྐྱོར་ཐོག་ལས་ཨིན་མི་ ལས་འགུལ་དེ་ དུས་ཡུན་ཟླཝ་༨ དེ་ཅིག་གི་ ནང་འཁོད་ལུ་ མཇུག་བསྡུ་ཚུགས་པའི་ རེ་བ་ཡོདཔ་ཨིན་པས།
ཨོམ་གི་ཐོན་སྐྱེད་ མར་དང་དར་ཚིལ་དང་ དམ་སྦྱིས་ནང་བཀང་མི་ཨོམ་དང་ འགྲོས་ཀྱིས་སྦེ་ ཞོ་དང་ཁྱེགས་ཟས་ཚུ་ཡང་ ཐོན་སྐྱེད་འབད་ནི་ཨིན་པས།
ཨོམ་གི་ཐོན་སྐྱེད་ཚུ་ཡང་ ཚོགས་པའི་འཐུས་མི་ཚུ་གི་བར་ན་ བསྟུན་གྲོས་འབད་ཐོག་ལས་ གོང་ཚད་རན་ཏོག་ཏོ་ཅིག་སྦེ་ བཟོ་ཞིནམ་ལས་ བསམ་གྲུབ་ལྗོངས་མཁར་ཁྲོམ་ཁར་ བཙོང་ཁང་ཅིག་ གཞི་བཙུགས་འབད་ཞིནམ་ལས་ དེ་ནང་ལས་ བཀྲམ་སྤེལ་འབད་ནི་ཨིན་པས།
རྫོང་ཁག་སྒོ་ནོར་འགོ་དཔོན་ཚུ་གིས་ སླབ་མིའི་ནང་ ཨོམ་བཟོ་སྦྱོར་འཕྲུལ་ཁང་དེ་ ཤར་ཕྱོགས་རྫོང་ཁག་ནང་ བཀྲིས་སྒང་ཆེ་ན་རི་གི་ ཤུལ་ལས་ར་ འཕྲུལ་ཁང་སྦོམ་ཤོས་༢ པ་ ཨིན་པའི་གནས་ཚུལ།
བསམ་གྲུབ་ལྗོངས་མཁར་ལས་ ཚེ་རིང་རྣམ་རྒྱལ།
