རྒྱ་སྐྱེད་འབད་བའི་བསྒང་ཡོད་མི་ བཀྲིས་སྒང་དང་ བཀང་ལུང་བར་ནའི་གཞུང་ལམ།

བཀྲིས་སྒང་དང་ བཀང་ལུང་བར་ནའི་ གཞུང་ལམ་རྒྱ་སྐྱེད་ཀྱི་ལཱ་ ཟླཝ་འདི་ནང་ མཇུག་བསྡུ་ནི།

༉ བཀྲིས་སྒང་དང་ བཀང་ལུང་བར་ནའི་ གཞུང་ལམ་རྒྱ་སྐྱེད་ཀྱི་ལཱ་དེ་ ཟླཝ་འདི་ནང་ མཇུག་བསྡུ་བའི་ རེ་བ་ཡོདཔ་ཨིན་པས།
ཧེ་མ་འབད་བ་ཅིན་ བཀྲིས་སྒང་ལས་ བཀང་ལུང་ཚུན་ སྣུམ་འཁོར་ནང་འགྱོ་བའི་སྐབས་ དུས་ཡུན་ཆུ་ཚོད་༡ དེ་ཅིག་འགོར་མི་དེ་ ད་ལྟོ་འབད་བའི་བསྒང་ལས་ དུས་ཡུན་སྐར་མ་༣༠ ནང་ ལྷོད་ཚུགསཔ་ཨིན་པས།
ལོ་ངོ་བཅུ་ཕྲག་༡ དེ་ཅིག་གི་ཧེ་མ་ལས་ ཀི་ལོ་མི་ཊར་༢༢ འབད་མི་ གཞུང་ལམ་རྒྱ་སྐྱེད་ཀྱི་ལཱ་ འགོ་བཙུགས་མི་དེ་ ད་ལྟོ་མཇུག་བསྡུ་རན་ཁར་ ལྷོད་དེ་འདུག།
ན་ཧིང་ སྤྱི་ཟླ་༧ པ་ཚུན་ གཞུང་ལམ་རིང་ཚད་ ཀི་ལོ་མི་ཊར་༢༢ ཡོད་ས་ལས་ ཀི་ལོ་མི་ཊར་༧ རྐྱངམ་གཅིག་གི་ རྩི་ནག་གཏང་ནིའ་ཚུ་ མཇུག་བསྡུ་ཡོདཔ་ཨིན་པས།
ཉིནམ་དག་པ་ཅིག་གི་ཧེ་མར་ བཀྲིས་སྒང་སྤམ་གཡུས་ཚན་ལས་ བཀང་ལུང་ཚུན་ ཀི་ལོ་མི་ཊར་༡༥ ཡོད་ས་ལས་ ཀི་ལོ་མི་ཊར་༡༢ རྒྱ་སྐྱེད་འབད་བ་གིས་མ་ཚད་ རྩི་ནག་ཚུ་ཡང་ བཏང་ཚར་ནུག།
ཟླ་ངོ་༦ གི་ནང་འཁོད་ལུ ལཱ་གི་གྲུབ་འབྲས་ལེགས་ཤོམ་ཐོན་མི་དེ་ལུ་ མི་སེར་ཁོང་ར་ ངལ་རངས་བྱུང་ཡོདཔ་ད་ བཀང་ལུང་ལས་ ཚོང་པ་ཅིག་གིས་ སླབ་མིའི་ནང་ ད་ལྟོ་ཚུན་ཚོད་ དུས་ཚོད་འགོར་མི་ལུ་ལྟཝ་ད་ གཞུང་ལམ་དེ་ ནམ་ཡང་ རྩི་ནག་གཏང་མི་ཚུགས་ནི་མས་ཟེར་ མནོ་ཡི་ཟེར་ཨིན་པས།
མ་གཞི་ ཟླཝ་༦ གི་ནང་འཁོད་ལུ་ ལམ་གྱི་གྲུབ་འབྲས་དེ་ལུ་བལྟ་བ་ཅིན་ གྲུབ་འབྲས་ལེགས་ཤོམ་ཐོན་མིའི་ གྲས་ཁར་ཨིན་རུང་ ལཱ་དེ་ དུས་ཅི་ སྤྱི་ཟླ་༣ པའི་ཚེས་༣༡ ལུ་ མཇུག་བསྡུ་དགོཔ་སྦེ་ཡོད་མི་དེ་ལུ་ ཌཱན་ཊག་ལས་འགུལ་གྱིས་ འབད་མ་ཚུགས་པས།
ཀུན་གསལ་གྱིས་ ཌཱན་ཊག་ལས་འགུལ་དང་གཅིག་ཁར་ ག་དེམ་ཅིག་ འབྲེལ་བ་འཐབ་ནིའི་དཔའ་བཅམ་ཡོད་རུང་ ཌཱན་ཊག་གི་ འགོ་དཔོན་ཚུ་གིས་ ལམ་རྒྱ་སྐྱེད་ཀྱི་ཐད་ཁར་ ག་ཅི་ཡང་ སླབ་མ་བཏུབ།
ལམ་རྩི་ནག་གཏང་ནི་གི་ ཁག་འབག་ཐོབ་མི་ ཊི་ཨེན་ཊི་ཚོང་འབྲེལ་ངོ་ཚབ་ བཀྲིས་རྣམ་རྒྱལ་གྱིས་ སླབ་མའི་ནང་ ལམ་རྩིས་སྤྲོད་འབད་ནི་གི་ དུས་ཚོད་དེ་ སྤྱི་ཟླ་༤ ལུ་ ཕར་འཕུལ་རྐྱབ་ཅི་ཟེར་ཨིན་པས།
ཀི་ལོ་མི་ཊར་༡༥ རྩི་ནག་གཏང་ནི་དེ་ ན་ཧིང་སྤྱི་ཟླ་༡༢ པའི་ནང་ལས་ འགོ་བཙུགས་ཡོདཔ་ད་ མ་གཞི་དུས་ཚོད་ཁར་ མཇུག་བསྡུ་ཚུགས་ནི་ཨིན་རུང་ གནམ་གཤིས་གནས་སྟངས་ལེགས་ཤོམ་མེད་མི་དེ་གིས་ བདུན་ཕྲག་༢ ཀྱི་རིང་ ལཱ་འབད་མ་ཚུགས་པར་ ལུས་སོ་ཡི་ཟེར་ཨིན་པས།
དེ་མ་ཚད་ གནད་དོན་གཅིག་ རྒྱ་གར་ཨ་སམ་གྱི་གཞུང་ལམ་བདའ་སྟེ་ འཕྲལ་འཕྲལ་སྦེ་ར་ ངོ་རྒོལ་འགྲེམས་སྟོན་འབད་མི་དེ་གིས་ ཕུན་ཚོགས་གླིང་ལས་ དུས་ཚོད་ཁར་ རྩི་ནག་ལྷོད་མ་ཚུགས་པའི་ དཀའ་ངལ་ལུ་བརྟེན་ཏེ་ཡང་ ཨིན་ཟེར་ཨིན་པས།
ཌཱན་ཊག་ལས་འགུལ་གྱིས་ ས་གནས་ནང་ལཱ་འབད་མི་ ལས་བྱེདཔ་ཐེབས་༢༠༠ དེ་ཅིག་བཙུགས་མི་དེ་གིས་ ད་ལྟོ་ ས་གནས་ནང་ ལཱ་འབད་མི་༣༠༠ དེ་ཅིག་ ཡོདཔ་ཨིན་པས།
རྩི་ནག་བཏང་ཚར་ཏེ་ཡོད་མི་ མགྱོགས་ལམ་དེ་ཁར་ སྣུམ་འཁོར་བཏང་མི་ཚུ་གིས་ སྣུམ་འཁོར་ཤུགས་ཚད་ལས་བརྒལ་ཏེ་ བཏང་མི་ཐོན་དོ་ཡོདཔ་ལས་ ཤུགས་ཚད་ལས་བརྒལ་བའི་ དཀའ་ངལ་ཚུ་ཐོནམ་མས་ཟེར་ གླ་འཁོར་དེད་གཡོགཔ་ཅིག་གིས་ སླབ་ཨིན་པས།
སྣུམ་འཁོར་བཏང་མི་ ལ་ལོ་ཅིག་གིས་ རང་ཕྱོགས་ལུ་མེན་པར་ གཞན་གྱི་ལམ་ཕྱོགས་ནང་ལས་ བཏང་མི་ཡང་ཡོདཔ་ལས་ དེ་གིས་ ཐུག་རྐྱེན་གྱི་དཀའ་ངལ་ཚུ་ འོང་སྲིད་ནི་ཨིནམ་ལས་ སྣུམ་འཁོར་བརྡ་སྟོན་སྡེ་ཚན་དང་ ལམ་འགྲུལ་ཉེན་སྲུང་དང་སྐྱེལ་འདྲེན་དབང་འཛིན་གྱིས་ བཀག་འཛིན་འབད་དགོཔ་འདུག་ཟེར་ བཤདཔ་ཨིན་པའི་གནས་ཚུལ།

ཡེ་ཤེས་སྒྲོལ་མ།

 

About admin

Check Also

ཟ་ཆས་ཉེན་སྲུང་ཆོག་ཐམ་མེད་པར་ ཀེ་བ་དོས་འབག་མི་ཊག་ རྒྱ་གར་ལུ་ བཀག་བཞག་ཡོདཔ།

༉ རྒྱ་གར་གྱི་ ཅ་དམ་འགོ་དཔོན་ཚུ་གིས་ ཟ་ཆས་ཉེན་སྲུང་གི་ ཆོག་ཐམ་མེད་པར་ ཀེ་བ་སྐྱེལ་འདྲེན་འབད་མི་ སྣུམ་འཁོར་ཊག་ཚུ་ བཀག་བཟུང་འབད་དོ་ཡོདཔ་ལས་ བསམ་གྲུབ་ལྗོངས་མཁར་ལུ་ ཀེ་བ་ཕྱིར་ཚོང་འཐབ་མི་དང་ རིན་བསྡུར་འབད་མི་ཚུ་ལུ་ ཀེ་བ་ཕྱིར་ཚོང་འཐབ་ནིའི་ནང་ གདོང་ལེན་བྱུང་དོ་ཡོདཔ་ཨིན་པས། ཀུན་དགའ་དོན་གྲུབ་ནང་འདྲེན་དང་ ཕྱིར་ཚོང་གི་ཇོ་བདག་ …

Leave a Reply

Your email address will not be published. Required fields are marked *