ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
༉ བཀྲིས་གཡང་རྩེ་རྫོང་ཁག་གིས་ ཁ་ཙ་ རྒྱལ་ཡོངས་ཚོགས་སྡེ་གི་ བཙག་འཐུ་ཐེངས་གསུམ་པ་ འགོ་འདྲེན་འཐབ་པའི་སྐབས་ སྐྱེས་ལོ་༣༥ ལང་མི་ སློབ་དཔོན་བགྲེསཔ་ ཀརྨ་རྒྱལ་མཚན་དེ་ འཐུས་མི་གསརཔ་སྦེ་ བཙག་འཐུ་འབད་ཡི།
ཁོ་གིས་ སྤྱི་ལོ་༢༠༡༦ ལུ་ གཡང་རྩེ་ཁྲོམ་གྱི་ ཁྲོམ་དཔོན་ནང་ དོ་འགྲན་འབད་ནིའི་དོན་ལུ་ སློབ་དཔོན་ནང་ལས་ དགོངས་ཞུ་འབད་ཡོད་རུང་ རྫོང་ཁག་ཁྲོམ་དང་འབྲེལ་བའི་ དཀའ་ངལ་ཐོན་པའི་ཤུལ་ལས་ དེ་སྦེ་ར་ སྡོད་པའི་ཤུལ་ལས་ དུས་ཅི་ ཚོགས་སྡེའི་དོན་ལུ་ ཁྲོམ་སྡེ་ནང་ལས་ བཅའ་མར་གཏོགས་ཡོདཔ་ཨིན་པས།
ཁོ་གིས་ འགྲེམ་ཐོག་ཚོགས་རྒྱན་བསྡོམས་༥༧༧ དང་ ཚོགས་རྒྱན་འཕྲུལ་ཆས་ནང་ ཚོགས་རྒྱན་༡,༣༧༥ ཐོབ་སྟེ་ བཙག་འཐུ་གྲུབ་ཡོདཔ་ཨིན་པས།
བཙག་འཐུའི་གྲུབ་འབྲས་གསལ་སྟོན་འབད་བའི་ཤུལ་ལས་ ཁོ་ར་ བརྒྱུད་འཕྲིན་ནང་ དགའ་ཚོར་བསྐྱེད་མི་ཚུ་ལས་ འགྲུལ་འཕྲིན་གཅིག་ཤུལ་གཉིས་སྦེ་ འོང་ནི་དེ་གིས་ བཙག་འཐུའི་གྲུབ་འབྲས་ལུ་ བསམ་འཆར་བཤད་ནིའི་ དུས་ཚོད་ར་མེདཔ་སྦེ་ མཐོང་ཡི།
གཡང་རྩེ་རྒེད་འོག་ལས་ དོ་འགྲན་འབད་མི་ འཕྲིན་ལས་ཀྱིས་ ཚོགས་རྒྱན་མཐོ་ཤོས་གཉིས་པ་ཐོབ་ཡོདཔ་ད་ ཁོ་གིས་ ཚོགས་རྒྱན་བསྡོམས་༡,༨༣༣ ཐོབ་མི་ཚུ་ཡང་ ཚོགས་རྒྱན་འཕྲུལ་ཆས་ཐོག་ལས་༡,༣༦༧ དང་ འགྲེམ་ཐོག་ཚོགས་རྒྱན་ཐོག་ལས་༤༦༦ ཐོབ་ཡོདཔ་ཨིན་པས།
འཕྲིན་ལས་དང་ ཀརྨ་རྒྱལ་མཚན་གྱི་བར་ན་ ཚོགས་རྒྱན་༡༡༩ གི་ཁྱད་པར་ཡོདཔ་ཨིན་པས།
རྫོང་ཁག་གི་ འཐུས་མི་བགྲེསཔ་ བཀྲིས་ཕུན་ཚོགས་ཀྱིས་ ཡ་ལང་རྒེད་འོག་ལས་ ལོག་སྟེ་ དོ་འགྲན་འབད་ཡོད་རུང་ ཁོ་གིས་ འདེམས་ངོ་དྲུག་གི་གྲས་ལས་ ཉུང་ཤོས་ཐོབ་ཡོདཔ་ལས་ ཚོགས་རྒྱན་བསྡོམས་༦༢༥ ལས་ ཐོབ་མ་ཚུགས་པས།
སྟོང་མ་བྱང་ས་རྒེད་འོག་གི་འདེམས་ངོ་ ངག་དབང་བཀྲིས་ཀྱིས་ འགྲེམ་ཐོག་ཚོགས་རྒྱན་༧༦༧ དང་ འཕྲུལ་ཆས་ཐོག་ལས་ ཚོགས་རྒྱན་༧༥༧ ཐོབ་ཡོདཔ་ཨིན་པས།
རམ་འཇར་རྒེད་འོག་གི་འདེམས་ངོ་ ཕུར་པ་རྒྱལ་མཚན་གྱིས་ འགྲེམ་ཐོག་ཚོགས་རྒྱན་༨༢༨ ཐོབ་མི་དེ་ མཐོ་ཤོས་ཨིན་རུང་ ཁོ་གིས་ འཕྲུལ་ཆས་ཐོག་ལས་ ཚོགས་རྒྱན་༩༧༡ ལས་བརྒལ་ ཐོབ་མ་ཚུགས།
ཁམས་དྭངས་རྒེད་འོག་གི་འདེམས་ངོ་ བསོད་ནམས་བསྟན་འཛིན་གྱིས་ འཕྲུལ་ཆས་ཐོག་ལས་ ཚོགས་རྒྱན་༧༡༩ དང་ འགྲེམ་ཐོག་ཚོགས་རྒྱན་༥༠༢ ལས་བརྒལ་ ཐོབ་མ་ཚུགས་པའི་གནས་ཚུལ།
བཀྲིས་གཡང་རྩེ་ལས་ བཀྲིས་བསྟན་འཛིན།
