ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
༉ ཁ་ཙ་ བསམ་གྲུབ་ལྗོངས་མཁར་ བདེ་བ་ཐང་ལུ་སྦེ་ ངན་ལྷད་བཀག་སྡོམ་ལྷན་ཚོགས་ཀྱི་ ཁྲི་འཛིན་བགྲེསཔ་ དྲགོས་གནས་བརྟན་བཟང་མོ་གིས་ འབྲུག་ཀུན་མཉམ་ཚོགས་པའི་ འཐུས་མི་སྦེ་ གཞུང་འབྲེལ་ཐོག་ ཐོ་བཀོད་འབད་ཡི།
བདེ་བ་ཐང་-སྒོམ་དར་འདེམས་ཁོངས་ལས་ དོ་འགྲན་འབད་ནི་ཨིན་མི་ དྲགོས་གནས་བརྟན་བཟང་མོ་གིས་ སྲིད་དོན་ནང་ འཛུལ་ཞུགས་འབད་དགོ་པའི་སྐོར་ བཤད་མིའི་ནང་ མི་ཚུ་གི་ མནོ་ལུགས་བསྒྱུར་བཅོས་འབད་དེ་ ཁྱད་པར་བཟོ་ཐབས་ལུ་ཨིན་མི་དེ་ཡང་ མི་ཚུ་གིས་ སྲིད་དོན་པ་ཚུ་ དྲང་བདེན་མེད་མི་དང་ བློ་གཏད་མ་ཚུགས་པའི་ མི་ཅིག་སྦེ་ བརྩི་འཇོག་འབད་བའི་ཁར་ བསམ་འཆར་བཀོད་ནི་ལུ་ཡང་ འདྲོག་སྡོད་ཡོད་མི་དེ་ མེདཔ་བཟོ་ཐོག་ལས་ སྲིད་དོན་པ་ཚུ་ལུ་ ཡིད་ཆེས་དང་ བློ་གཏད་བསྐྱེད་ཚུགསཔ་བཟོ་སྟེ་ བསམ་འཆར་བཀོད་ནིའི་ ས་གོ་བཟོ་ཐབས་ལུ་ཨིན་ཟེར་ཨིན་པས།
མོ་གིས་འབད་བ་ཅིན་ འབྲུག་ཀུན་མཉམ་ཚོགས་པ་དེ་ ལོ་༥ འི་དོན་ལུ་མེན་པར་ ཡུན་བརྟན་གནས་ནི་གི་ གཞི་རྩ་ལུ་ གཙོ་བོར་བཟུང་མི་ཅིག་ཨིན་པའི་ཁར་ མོ་ར་ཡ་ གཞི་རྩ་དང་ འགལ་བ་འགྱོ་མ་ཚུགས་མི་ཅིག་འབདཝ་ལས་ ཚོགས་པའི་ལྟ་བ་དང་ དམིགས་ཡུལ་ལ་སོགས་པ་ཚུ་ལུ་ ཡིད་ཆེས་བསྐྱེད་མི་ལུ་བརྟེན་ ཚོགས་པ་འདི་ནང་ འཛུལ་ཞུགས་འབད་ནིའི་ གདམ་ཁ་རྐྱབ་ཅི་ཟེར་ཨིན་པས།
དྲགོས་གནས་བརྟན་བཟང་མོ་གིས་ བཤད་མིའི་ནང་ ལྟ་བ་ཟེར་རུང་ ཚོགས་རྒྱན་བཙུགས་མི་བཙུགས་དང་ གཞི་རྩ་ལས་མ་འགལ་བར་ འགོ་འདྲེན་འཐབ་མི་འཐབ་ བལྟ་ནི་དེ་ཨིནམ་ད་ མོ་དང་ འབྲུག་ཀུན་མཉམ་ཚོགས་པ་གིས་ ཚོགས་རྒྱན་འཐོབ་མ་ཚུགས་རུང་ ཁོང་གིས་ སླབ་མི་ཚུ་ མི་ཚུ་གིས་ སེམས་ཁར་དྲན་ཏེ་ མནོ་ལུགས་བསྒྱུར་བཅོས་འབད་ཚུགས་པ་ཅིན་ རྒྱལ་ཁ་ཟེར་རུང་ དེ་ཨིན་ཟེར་ བཤདཔ་ཨིན་པས།
མོ་གིས་འབད་བ་ཅིན་ སྤྱི་གཡོག་ནང་ལས་ དགོངས་ཞུ་འབད་བའི་ཤུལ་ལས་ ལོ་ཕྱེད་དང་༢ ལྷགཔ་ཅིག་ གཡུས་སྒོ་ཚུ་ནང་ ལཱ་འབད་སྡོདཔ་ད་ བསྒྱུར་བཅོས་འབད་དགོ་པ་ཅིན་ ག་ཏེ་ཡང་ ཕྱག་ཞུ་དགོ་པའི་སྐོར་ ཤེས་རྟོགས་བྱུང་ཡི་ཟེར་ཨིན་པས།
ཚོགས་པའི་གཙོ་འཛིན་ བསོད་ནམས་སྟོབས་རྒྱས་ཀྱིས་ སླབ་མིའི་ནང་ དྲགོས་གནས་བརྟན་དེ་ མི་གཏམ་ཡོད་པའི་ཁར་ ལྕོགས་གྲུབ་ཅན་གྱི་ འགོ་ཁྲིདཔ་ཅིག་འབདཝ་ལས་ འདས་པའི་ལོ་༧ གྱི་ ཧེ་མ་ལས་ར་ མོ་ལུ་ འཐུས་མི་སྦེ་ འོང་དགོ་པའི་སྐོར་ ཨུ་ཚུགས་བསྐྱེད་དེ་ར་ སྡོད་ཅི་ཟེར་ཨིནམ་ད་ ད་རེས་འབདཝ་ད་ དྲགོས་ཀྱིས་ ཚོགས་པ་ལུ་ ཡིད་ཆེས་འདྲོངས་ཏེ་ འཐུས་མི་སྦེ་ ཐོ་བཀོད་འབད་མི་ལུ་ དགའ་ཚོར་དང་ བྱོན་པ་ལེགས་སོ་ཡོད་ཟེར་ བཤདཔ་ཨིན་པས།
དྲགོས་གནས་བརྟན་བཟང་མོ་དེ་ སྲིད་དོན་ནང་ འཛུལ་ཞུགས་འབད་བའི་ གནས་ཚུལ་གོ་བའི་ཤུལ་ལས་ བློན་ཆེན་ཚེ་རིང་སྟོབས་རྒྱས་ཀྱིས་ བརྡ་བརྒྱུད་ལུ་ གསུངས་མིའི་ནང་ མོ་གིས་ སྲིད་ཚོགས་ནང་འཛུལ་ནི་གི་ ཐག་བཅད་མི་དེ་གིས་ དམངས་གཙོའི་རིང་ལུགས་ ལྷག་པར་དུ་ སྒྲིང་སྒྲི་འགྱོ་ནི་དང་ མི་མང་ལུ་ ཞབས་ཏོག་ཞུ་ནི་གི་ བརྡ་མཚོན་སྟོནམ་ལས་ དགའ་ཚོར་ཡོད་ཟེར་ཨིན་པའི་གནས་ཚུལ།
བསམ་ལྗོངས་ལས་ སྐལ་བཟང་དབང་ཕྱུག།
