ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
༉ རྒྱལ་ཡོངས་ཚོགས་སྡེ་ནང་ གོ་གནས་ཐོག་ཡོད་མི་ བཀྲིས་རྡོ་རྗེ་དེ་ དབང་འདུས་ཕོ་བྲང་རྫོང་ཁག་གི་ འཐུས་མི་སྦེ་ ལོག་བཙག་འཐུ་གྲུབ་ནུག།
སྤྱི་ཟླ་༤ པའི་ཚེས་༢༠ ལུ་ ཚོགས་རྒྱན་གྱི་ཉིནམ་ནང་ ཁོ་གིས་ ཚོགས་རྒྱན་༤,༩༩༥ ཐོབ་སྟེ་ བསྐྱར་ཞིབ་ཚོགས་ཁང་ནང་ ད་རུང་ གནས་ཡུན་ལོ་ལྔ་ ཕྱག་ཞུ་ནིའི་ གོ་སྐབས་ཐོབ་ཡོདཔ་ད་ དབང་འདུས་ལས་ རྒྱལ་ཡོངས་ཚོགས་སྡེའི་དོན་ལུ་ འདེམས་ངོ་༥ གིས་ དོ་འགྲན་འབད་ཡོདཔ་ཨིན་པས།
སྦྱེ་ནག་རྒེད་འོག་ལས་ པ་སངས་འཕྲིན་ལས་ཀྱིས་ ཚོགས་རྒྱན་༣,༧༥༡ དང་ སྲས་ཕུག་རྒེད་འོག་ལས་ ཟླ་བ་ཚེ་རིང་གིས་ ཚོགས་རྒྱན་༡,༦༡༨ བ་འཇོ་ཁྲོམ་ལས་ ར་བྲག་དབང་ཕྱུག་གིས་ ཚོགས་རྒྱན་༡,༣༥༧ ཐེད་ཚོ་ལས་ འཕྲིན་ལས་ཀྱིས་ ཚོགས་རྒྱན་༤༢༧ ཐོབ་ནུག།
རྫོང་ཁག་དེ་ནང་ ཚོགས་རྒྱན་སྐྱུར་མི་བརྒྱ་ཆ་༦༠ ལྷགཔ་ཅིག་གིས་ བཙག་འཐུ་ནང་ གྲལ་གཏོགས་འབད་ནུག།
རྫོང་ཁག་གི་ རྒེད་འོག་༡༥ དང་ཁྲོམ་སྡེ་༡ ནང་ ཚོགས་རྒྱན་ས་ཁོངས་༤༧ ཡོད་མི་ཚུ་ནང་ ཚོགས་རྒྱན་འཕྲུལ་ཆས་ཚུ་ནང་ ཚོགས་རྒྱན་བསྡོམས་༩,༧༡༧ དང་ འགྲེམ་ཐོག་ཚོགས་རྒྱན་༢,༤༣༡ གྲངས་རྩིས་རྐྱབ་ནུག།
རྫོང་ཁག་གིས་ འགྲེམ་ཐོག་ཚོགས་རྒྱན་༢,༥༤༧ ཐོབ་མི་ལས་༡༡༦ ཆ་མེད་ཡར་སོང་ཡོདཔ་ད་ རྫོང་ཁག་དེ་ནང་ ཁྱད་ཚན་ལྡན་པའི་ ཚོགས་རྒྱན་སྐྱུར་མི་༡༩,༦༩༣ ཡོདཔ་ཨིན་པས།
བང་སྟོད་ཁ་སློབ་གྲྭའི་ཚོགས་རྒྱན་ས་ཁོངས་ནང་ ཚོགས་རྒྱན་བཙུགས་མི་ དང་པ་ཨིན་མི་ བཀྲིས་རྡོ་རྗེ་གིས་ སླབ་མིའི་ནང་ ཁོ་གིས་ རྒྱལ་ཁ་འཐོབ་ནི་གི་ རེ་བ་བསྐྱེད་མི་དེ་ཡང་ མི་སེར་ལས་ རྒྱབ་སྐྱོར་ཡོད་ནི་དེ་གིས་ བཙག་འཐུ་ནང་ ལོག་བཅའ་མར་གཏོགས་ཅི་ཟེར་ཨིན་པས།
ཨ་ལོ་གསུམ་གྱི་ཨའི་ བསོད་ནམས་དབང་མོ་དེ་ མོ་གི་ཨ་ལོ་ཚུ་ ཕམ་དང་གཅིག་ཁར་བཞག་སྟེ་ ཚོགས་རྒྱན་བཙུགས་པར་ འོང་ཡོདཔ་ད་ ཚོགས་རྒྱན་བཙུགས་ནི་དང་ སྤྱི་ཚོགས་ནང་ མི་སེར་གྱི་ ཚ་གྱང་ཞུ་ནི་ཨིན་མི་ འོས་ལྡན་གྱི་ འདེམས་ངོ་ཅིག་ གདམ་ཁ་རྐྱབ་ནི་དེ་ གལ་ཆེ་ཟེར་ མོ་གིས་ བཤདཔ་ཨིན་པས།
སྐྱེས་ལོ་༣༩ ལང་མི་ ཁག་འབགཔ་བཀྲིས་དཔལ་འབྱོར་དེ་ ཚོགས་རྒྱན་བཙུགས་པར་ དགེ་ལེགས་ཕུག་ལས་ འོང་ཡོདཔ་ད་ ཁོ་གིས་འབད་བ་ཅིན་ ཚོགས་རྒྱན་བཙུགས་ནི་དེ་ མི་སེར་གྱི་ འགན་ཁུར་ཨིནམ་མ་ཚད་ འདེམས་ངོ་ཚུ་ཡང་ མང་པའི་སྦུག་ལས་སེལ་ཏེ་ ཉུང་པའི་སྦུག་ལས་ གདམ་ནི་གི་ གོ་སྐབས་ཅིག་ཡང་ཨིན་ཟེར་མནོ་སྟེ་ ཚོགས་རྒྱན་བཙུགས་པར་ འོང་ཡི་ཟེར་ཨིན་པའི་གནས་ཚུལ།
