ངན་ལྷད་བཀག་སྡོམ་ལྷན་ཚོགས་དང་ བཟོ་སྐྲུན་གོང་འཕེལ་བཀོད་ཚོགས་ཀྱི་བར་ན་ བསྐྱར་ཞིབ་གོ་བརྡའི་ཆིངས་ཡིག་གུ་ མཚན་རྟགས་བཀོད་ཡོདཔ།

༉ བཟོ་སྐྲུན་ལས་སྡེ་ཚུ་ནང་ ངན་ལྷད་བཀག་ཐབས་འབད་ནི་དང་ ཤེས་ཡོན་སྤེལ་ནི་ དེ་ལས་ ཁྲིམས་འགལ་གྱི་ལཱ་ནང་འབྲེལ་གཏོགས་འབད་མི་ཚུ་ ཞིབ་དཔྱད་འབད་ནིའི་དོན་ལུ་ ཁ་ཙ་ ཐིམ་ཕུག་ལུ་ ངན་ལྷད་བཀག་སྡོམ་ལྷན་ཚོགས་དང་ བཟོ་སྐྲུན་གོང་འཕེལ་བཀོད་ཚོགས་ཀྱི་བར་ན་ བསྐྱར་ཞིབ་གོ་བརྡའི་ཆིངས་ཡིག་གུ་ མཚན་རྟགས་བཀོད་ཅི།
ད་རེས་ནངས་པར་ ཁག་འབགཔ་དང་ མཁོ་སྒྲུབ་ལས་སྡེ་ཚུ་གིས་ རིན་བསྡུར་ཞིབ་དཔྱད་ཀྱི་དོན་ལུ་ རང་སོའི་ཁག་འབགཔ་གི་ ཡིག་ཆ་ཚུ་ རྫུས་མ་བཟོ་སྟེ་བཙུགས་མི་ བྱ་སྤྱོད་ངན་པ་དེ་ཡང་ ད་ལས་ཕར་ བསལ་ཚུགས་ནི་ཨིན་པས།
ཁག་འབགཔ་ཚུ་གིས་ རིན་བསྡུར་གྱི་ དབྱེ་དཔྱད་སྐབས་ ཁག་འབགཔ་པའི་ ཁྱད་ཡོན་ཐོ་དང་ ངོ་སྤྲོད་ལག་ཁྱེར་ དངུལ་ཁང་གི་འགན་ལེན་ བཟོ་སྐྲུན་གྱི་ འཕྲུལ་ཆས་ཚུ་གི་ བདག་དབང་ལག་ཁྱེར་ དེ་ལས་ ལས་འབྲེལ་ཚད་གཞི་ཚུ་ ཚུལ་མིན་ཐོག་ལས་ བཙུགས་དོ་ཡོདཔ་ཨིན་པས།
བཀོད་ཚོགས་ཀྱི་མདོ་ཆེན་ ཕུརཔ་རིག་འཛིན་གྱིས་ སླབ་མིའི་ནང་ གོ་བརྡའི་ཆིངས་ཡིག་ལུ་བརྟེན་ དེ་བཟུམ་མའི་ ཚུལ་མིན་འཐབ་མི་ཚུ་ བཀག་ཐབས་འབད་ཚུགས་ནི་ཨིནམ་མ་ཚད་ ཁག་འབགཔ་དང་ མཁོ་སྒྲུབ་ལས་སྡེ་ཚུ་གིས་འབད་རུང་ དྲན་སྐུལ་འབད་ནི་ལུ་ ལྷན་ཐབས་འབྱུང་ཚུགས་ཟེར་ཨིན་པས།
བཀོད་ཚོགས་ཀྱིས་ མི་མང་ཞབས་ཏོག་བྱིན་པའི་སྐབས་དང་ བཟོ་སྐྲུན་ཚུ་ ལྟ་རྟོག་དང་ ཁྲིམས་བསྟར་སྤྱོད་འབདཝ་ད་ ཀུན་སྤྱོད་དང་ དྲང་བདེན་ཚུ་ ཡར་དྲག་གཏང་ཚུགས་ཟེར་ ཕུརཔ་རིག་འཛིན་གྱིས་ བཤད་ཅི།
ཚོགས་སྡེའི་འགོ་དཔོན་ཚུ་གིས་ བཤད་མིའི་ནང་ ཆིངས་ཡིག་དེ་གིས་ ལྷག་པར་དུ་ ལྷན་ཚོགས་དང་ བཀོད་ཚོགས་ཀྱི་བར་ན་ མཉམ་འབྲེལ་སྒྲིང་སྒྲི་བཟོ་སྟེ་ བཟོ་སྐྲུན་ལས་སྡེ་ཚུ་ནང་ ངན་ལྷད་དང་འབྲེལ་བའི་ བྱ་སྤྱོད་ངན་པ་ཚུ་ཡང་ བཀག་ཐབས་འབད་ཚུགས་ཟེར་ཨིན་པས།
ངན་ལྷད་བཀག་སྡོམ་ལྷན་ཚོགས་ཀྱི་ ལྷན་འཛིན་སྤྱི་ཁྱབ་ ཀུན་ལེགས་དབྱངས་འཛོམས་ཀྱིས་ སླབ་མིའི་ནང་ གོ་བརྡའི་ཆིངས་ཡིག་དེ་ཡང་ སྤྱི་ལོ་༢༠༡༣ ལུ་ མཚན་རྟགས་བཀོད་ཡོདཔ་བཞིན་དུ་ ཀུན་སྤྱོད་དང་ དྲང་བདེན་འཛིན་སྐྱོང་ནང་ ལག་ལེན་འཐབ་ཅི་ཟེར་ཨིན་པས།
དེ་དང་འཁྲིལ་ཏེ་ འབྲེལ་ཡོད་ལས་སྡེ་ཚུ་ལུ་ གོ་བརྡའི་ལས་རིམ་ཅིག་ཡང་ འགོ་འདྲེན་འཐབ་ཡོདཔ་བཞིན་དུ་ ཆིངས་ཡིག་དེ་གིས་ ཁག་འབགཔ་ཚུ་གི་ ཐད་ཀར་གྱི་ བརྡ་དོན་ཚུ་ ཡོངས་འབྲེལ་ཐོག་ལུ་ འཐོབ་ཚུགས་ནི་ཨིནམ་ལས་ ངན་ལྷད་གདོང་ལེན་འབད་ཚུགས་ནི་མས་ཟེར་ཨིན་པས།
ཕུརཔ་རིག་འཛིན་གྱིས་ སླབ་མིའི་ནང་ ད་རེས་ བཟོ་སྐྲུན་ལས་སྡེ་གིས་ རྒྱལ་ཁབ་ནང་ ནང་འཁོད་ཐོན་སྐྱེད་ཡོངས་འབོར་ བརྒྱ་ཆ་༡༦.༨༦ དང་ ལཱ་གཡོག་བརྒྱ་ཆ་༣.༢ དེ་ལས་ འཆར་ཞི་༡༡ པའི་ནང་ བརྒྱ་ཆ་༦༠ དེ་ཅིག་ མཁོ་སྒྲུབ་ནང་ བགོ་བཀྲམ་འབད་དེ་འདུག་ཟེར་ཨིན་པས།
དེ་བཟུམ་སྦེ་ བཟོ་སྐྲུན་ལས་སྡེ་གིས་ སྤྱི་ལོ་༢༠༢༠ གི་ནང་འཁོད་ལུ་ གློག་ཤུགས་མེ་ག་ཝཱཊ་༥,༠༠༠ ཐོན་སྐྱེད་འབད་ནི་ དམིགས་གཏད་བསྐྱེད་དེ་ཡོདཔ་བཞིན་དུ་ འཁོར་ལམ་ཀི་ལོ་མི་ཊར་༢,༠༠༠ དེ་ཅིག་ བསལ་ནི་ཨིན་པས།
ད་རེས་ རྒྱལ་ཁབ་ནང་ ཁག་འབགཔ་༤,༠༣༨ དང་ སྒེར་སྡེ་བཟོ་རིག་འགོ་དཔོན་༡,༣༠༧ ཡོད་མིའི་གྲས་ལས་ རྒྱ་གར་གྱི་ མི་ཁུངས་༣༥༤ དང་ ས་རྐོ་འཕྲུལ་ཆས་༢,༦༤༥ དེ་ཅིག་ ཡོདཔ་ཨིན་པའི་གནས་ཚུལ།

ཨོ་རྒྱན་རྡོ་རྗེ།

 

About admin

Check Also

གསོ་རིག་གཙུག་ལག་སློབ་སྡེའི་ ལྕོགས་གྲུབ་གོང་འཕེལ་གཏང་ནི་ལུ་ གོ་བརྡའི་ཆིངས་ཡིག་གུ་ མཚན་རྟགས་བཀོད་ཡོདཔ།

༉ སྤྱི་ཟླ་༡ པའི་ཚེས་༣༠ ལུ་ གསོ་བའི་ཤེས་ཡོན་ལས་རིམ་ ཡར་དྲག་གཏང་ནི་ནང་ གསོ་བ་ལྷན་ཁག་དང་ གེ་སར་རྒྱལ་པོ་གསོ་རིག་གཙུག་ལག་སློབ་སྡེ་༢ མཉམ་འབྲེལ་གོང་འཕེལ་གཏང་ནིའི་དོན་ལུ་ གོ་བརྡའི་ཆིངས་ཡིག་ཅིག་གུ་ མཚན་རྟགས་བཀོད་ཡོདཔ་ཨིན་པས། གོ་བརྡའི་ཆིངས་ཡིག་ཅིག་གི་ དམིགས་ཡུལ་དེ་ཡང་ གསོ་བའི་ལས་བྱེདཔ་ཚུ་ལུ་ འཇོན་ཐངས་ཅན་དང་ …

Leave a Reply

Your email address will not be published. Required fields are marked *