ཀུན་གསལ། – རྒྱལ་ཡོངས་ཉིན་བསྟར་གསར་ཤོག།
ཁ་ཙ་ མེ་ཏོག་འགྲུལ་སྐྱེལ་བཱསི་དེ་ དགེ་ལེགས་ཕུག་ལས་ ཐིམ་ཕུག་ལུ་འོངམ་ད་ གསར་སྤང་ཞིབ་དཔྱད་སྒོ་ར་ལས་ ཀི་ལོ་མི་ཊར་༣ གྱི་ས་གནས་ ཤེས་ལྕམ་ཐང་(ར་ནི་བཱ་གཱན) ལུ་ལྷོདཔ་ད་ ལམ་འོག་ལས་མར་ ཕིཊ་༡༨ ཀྱི་ས་ཁར་ རྦོབ་རིལ་ཡར་སོཔ་ལས་ འགྲུལ་པ་སྐྱེས་ལོ་༥༢ ལང་མི་ ཨམ་སྲུ་ཅིག་གི་ མགུ་ཏོ་ཁར་ རྨ་སྐྱོན་དུམ་གྲ་ཅིག་བྱུངམ་ལས་ ད་ལྟོ་ གསར་སྤང་སྨན་ཁང་ནང་ སྨན་བཅོས་འབད་བའི་བསྒང་ཡོདཔ་བཞིན་དུ་ ད་རེས་ སྨན་ཁང་ནང་ལས་ གཏང་ནི་གི་ རེ་བ་ཡོདཔ་ཨིན་པས།
འགྲུལ་སྐྱེལ་བཱསི་དེ་ནང་ ཨ་ལོ་༡ བརྩིས་ཏེ་ འགྲུལ་པ་༡༧ ཡོད་མི་ལས་༡༣ གསར་སྤང་སྨན་ཁང་ནང་ བསྐྱལ་ཡོད་རུང་ འགྲུལ་པ་༣ རྐྱངམ་གཅིག་ལུ་ སྨན་བཅོས་འབད་དགོཔ་ ཐོན་ཡོདཔ་ད་ རྐྱེན་ངན་དེ་ཡང་ བཱསི་དེ་ ཤེས་ལྕམ་ཐང་གི་ལྟག་ལས་མར་ ཤུགས་ཚད་ལས་བརྒལ་ཏེ་འོང་མི་ སྣུམ་འཁོར་ཊི་པར་ཊཱག་དང་ ཁ་ཐུག་རྐྱབ་པའི་སྐབས་ བཱསི་གི་དེད་གཡོགཔ་དེ་གིས་ ཐུག་རྐྱེན་འབྱུང་ནི་ལས་ ཟུར་ཐབས་ལུ་ འཁོར་ལམ་གྱི་ ཟུར་བདའ་སྟེ་ བཏོག་པའི་སྐབས་ རྦོབ་རིལ་ཡར་སོཔ་ ཨིན་པའི་གནས་ཚུལ།
