ཀོ་རོ་ན་བའེ་རཱསི་ཐོབ་མི་༨༢ ལས་༧༦ དྲག་ཡོདཔ།

༉ དུས་ཅི་ སྤྱི་ཟླ་༣ པ་ལས་ སྤྱི་ཟླ་༧ པའི་ཚེས་༡༢ ཀྱི་བར་ན་ ནད་ཡམས་ཀོ་རོ་ན་བའེ་རཱསི་༼ཀོ་བིཌ་-༡༩༽ ཐོབ་མི་༨༢ ལུ་ ཡར་འཕར་སོང་མི་ལས་ ནདཔ་༧༦ དྲག་ཡོདཔ་སྦེ་ ཁ་ཙ་ གསོ་བ་ལྷན་ཁག་གིས་ གསལ་བསྒྲགས་འབད་ནུག།
དེ་དང་གཅིག་ཁར་ མི་ཌཱལ་ཨིསི་ཊ་ལུང་ཕྱོགས་ལས་ རྒྱལ་ཁབ་ནང་ ལོག་འོང་མི་ འབྲུག་མི་ཕོ་སྐྱེས་༡ དང་ ཨམ་སྲུ་༡ ལུ་ ཀོ་བིཌ་-༡༩ ཐོབ་ཡོད་པའི་ གྲུབ་འབྲས་ཐོན་མི་དང་བསྟུན་ འབྲུག་ལུ་ ནད་འབུབ་ཐོབ་མིའི་གྱངས་ཁ་༨༢ ལུ་ ལྷོད་ཡོདཔ་ད་ ནདཔ་༢ ཡང་ སྤ་རོ་ལུ་ ཟུར་བཞག་ནད་བརྟག་ཁང་ནང་ བཞག་པའི་སྐབས་ སྤྱི་ཟླ་༧ པའི་ཚེས་༡༡ ལུ་ བརྟག་དཔྱད་འབདཝ་ད་ ཀོ་བིཌ་-༡༩ ཐོབ་ཡོདཔ་ བདའ་ཟུན་པའི་ཤུལ་ལས་ ཐིམ་ཕུག་རྒྱལ་ཡོངས་གཙོ་བསྟེན་སྨན་ཁང་གི་ རྐྱང་གནས་ནད་ཁང་ནང་ སྤོ་བཤུད་འབད་ཡོདཔ་ཨིན་པས།
རྒྱལ་ཡོངས་ཀོ་བིཌ་-༡༩ གི་ དུས་མཐུན་གནས་སྡུད་དང་འཁྲིལཝ་ད་ ད་ལྟོ་ སྨན་ཁང་གི་ རྐྱང་གནས་ནད་ཁང་ནང་ ནདཔ་༦ མ་གཏོགས་ གཞན་ག་ར་ དྲག་སོ་ཡི་ཟེར་ཨིན་པས།
གསོ་བའི་སྒྲིག་གཞི་དང་འཁྲིལཝ་ད་ ཟུར་བཞག་ནད་བརྟག་ལྟེ་བ་ཚུ་ནང་ ཟུར་བཞག་མི་ཚུ་ལས་ ཀོ་བིཌ་-༡༩ ཐོབ་ཡོདཔ་ བདའ་ཟུན་མི་དང་བསྟུན་ སྨན་ཁང་གི་ རྐྱང་གནས་ནད་ཁང་ནང་ སྤོ་བཤུད་འབད་དེ་ སྨན་བཅོས་དང་ ལྟ་རྟོག་འབད་བའི་ཤུལ་ལས་ ད་རུང་ ནད་འབུབ་ཡོད་མེད་ཀྱི་ བརྟག་དཔྱད་འབདཝ་ད་ དུས་ཡུན་ཆུ་ཚོད་༢༤ ནང་ ནད་མེད་པའི་ གྲུབ་འབྲས་ལན་ཐེངས་༢ ཐོན་པའི་ཤུལ་ལུ་ ཟུར་བཞག་ནད་བརྟག་ལྟེ་བ་ནང་ ད་རུང་ བདུན་ཕྲག་༢ ཀྱི་རིང་ ཟུར་བཞགཔ་ཨིན་པས།
བདུན་ཕྲག་༢ ཀྱི་ དུས་ཡུན་ཚངམ་ད་ ད་རུང་ ནད་ཡམས་ཀྱི་ ནད་བརྟག་འབད་བའི་སྐབས་ ནད་འབུབ་མེདཔ་ ཐོན་པ་ཅིན་ ནདཔ་དེ་ ལེགས་ཤོམ་སྦེ་ དྲག་པའི་གྲངས་སུ་ བརྩི་འཇོག་འབདཝ་ཨིན་པས།
ད་ལྟོ་ཚུན་ ཀོ་བིཌ་-༡༩ ཐོབ་མི་ ནདཔ་༧༦ དྲག་མི་ལས་ ཨམ་སྲུ་༣༩ དང་ ཕོ་སྐྱེས་༣༧ ཨིན་པས།
ད་རེས་ནངས་པར་ ཟུར་བཞག་ནད་བརྟག་ཁང་༣༢ ནང་ ཟུར་བཞག་མི་༥༩༥ ཡོདཔ་ཨིན་པས།
གསོ་བ་ལྷན་ཁག་གིས་ མི་མང་ལུ་ དྲན་གསོ་འབད་མིའི་ནང་ ས་མཚམས་ཁྲོམ་དང་ ས་མཚམས་བདའ་སྟེ་ཡོད་མི་ གཡུས་མི་ཚུ་གིས་ རང་སོའི་འགན་ཁུར་ ཚུལ་ལྡན་འབག་ཞིནམ་ལས་ ལྷན་ཁག་གི་ སྒྲིག་གཞི་དང་ གཞུང་གི་ཁྲིམས་ལུགས་ཚུ་ལས་འགལ་བའི་ བྱ་ངན་འབད་ནི་ཚུ་ ག་དེ་དྲག་དྲག་ འཛེམ་དགོ་པའི་ཁར་ ཁ་རས་ལག་ལེན་དང་ གཙང་སྦྲ་དང་ལྡནམ་སྦེ་ སྡོད་དགོ་ཟེར་ དུས་མཐུན་སྙན་ཞུ་ནང་ བཀོད་ཡོད་པའི་གནས་ཚུལ།

བཀྲིས་ཕུན་ཚོགས།

 

About admin

Check Also

གསར་སྤང་ཊཱར་ལུ་ ལོ་༢ དེ་ཅིག་གི་རྒྱབ་ལས་ ཁྱིམ་ཚུ་ བཟོ་སྐྲུན་འབད་ཆོག་ནི།

༉ ཁ་ཙ་ རྒྱལ་ཡོངས་ཚོགས་འདུའི་དྲི་བཀོད་ལས་རིམ་ འགོ་འདྲེན་འཐབ་པའི་སྐབས་ ཞབས་ཏོག་བློན་པོ་ རྡོ་རྗེ་ཚེ་རིང་གིས་ ད་རེས་ འགོ་འདྲེན་འཐབ་པའི་བསྒང་ཡོད་མི་ གསར་སྤང་ཊཱར་གྱི་ ས་གནས་གོང་འཕེལ་ས་ཁོངས་ནང་ ལོ་༢ དེ་ཅིག་གི་རྒྱབ་ལས་ ཁྱིམ་ཚུ་ བཟོ་སྐྲུན་འབད་ཚུགས་ཟེར་ཨིན་པས། ད་རེས་ …

Leave a Reply

Your email address will not be published. Required fields are marked *